الجنيه يواصل التعافي والدولار يعاني.. كواليس اللي بيحصل في سوق صرف العملات الأجنبية
إيه اللي حصل للدولار بعد ما كان بيقرب من 51 جنيه؟ وهل الجنيه المصري قادر يستعيد جزء من قيمته المفقودة؟ وليه الدولار بيتراجع رغم استمرار التوترات في المنطقة؟ وإيه حكاية الأموال الساخنة اللي داخلة يوم وطالعة اليوم اللي بعده؟ وهل اللي بيحصل دلوقتي ممكن يغير شكل سوق الصرف خلال الفترة الجاية؟
كل دي أسئلة بقت بتشغل ناس كتير خصوصا بعد التغيرات السريعة اللي حصلت في سوق الدولار خلال الأيام الأخيرة واللي كشفت إن اللي بيحرك السوق النهارده مش سبب واحد لكن مجموعة عوامل محلية وعالمية بتشتغل مع بعض في نفس الوقت.
أول سؤال لازم نسأله هو ليه الدولار بدأ يتراجع من جديد بعد الارتفاعات الأخيرة؟
بص يا سيدي.. العملة الأمريكية سجلت خسارة جديدة في آخر تعاملات عشان تواصل التراجع لليوم التاني على التوالي بعد القفزة اللي حققتها في بداية الأسبوع وده حصل بعد ما الدولار نفسه بدأ يضعف عالميا ووصل لأقل مستوياته خلال شهر كامل بسبب بيانات التضخم الأمريكية اللي طلعت أقل من المتوقع وخلت الأسواق تتوقع إن مجلس الاحتياطي الفيدرالي هيكون أقل ميلا لرفع أسعار الفايدة خلال الفترة الجاية ولما الدولار يضعف عالميا طبيعي الجنيه المصري يستفيد ويسترد جزء من قوته.
ولو بصينا على أسعار الصرف هنلاقي إن أعلى سعر للدولار كان في بنك نكست عند 50.58 جنيه للشراء و50.68 جنيه للبيع بينما أقل سعر كان في بنك الإمارات دبي الوطني وبنك فيصل الإسلامي عند 50.40 جنيه للشراء و50.50 جنيه للبيع وفي البنوك الكبرى زي الأهلي المصري وبنك مصر والمصرف العربي وأبوظبي الإسلامي والإسكندرية والمصري الخليجي والتعمير والإسكان والتنمية الصناعية وميد بنك والمصرف المتحد وإتش إس بي سي والعربي الأفريقي سجل الدولار 50.50 جنيه للشراء و50.60 جنيه للبيع أما في البنك المركزي فسجل 50.48 جنيه للشراء و50.62 جنيه للبيع ودي أرقام بتوضح إن السوق دخل في مرحلة هدوء بعد موجة الصعود الأخيرة.
لكن هل قوة الجنيه الحالية جاية من تراجع الدولار العالمي بس؟
الحقيقة لأ.. لأن في عوامل داخلية كمان بتدعم العملة المصرية ومن أهمها الأداء اللي حققه الجنيه خلال الفترة الأخيرة لأن الجنيه أنهى 2025 على ارتفاع وصل إلى 6.7% قدام الدولار مدفوع بقفزة كبيرة في تحويلات المصريين العاملين بالخارج وكمان بتحسن السيولة داخل القطاع المصرفي ودي عوامل ساعدت السوق يبقى أكثر قدرة على امتصاص أي ضغوط خارجية.
طب ليه الأموال الساخنة بتتحرك بالشكل السريع ده؟
النوع ده من الاستثمارات بطبيعته بيتحرك بسرعة جدا حسب الظروف العالمية والأحداث السياسية لأن المستثمر الأجنبي بيدور دائما على أعلى عائد بأقل مخاطرة وأي توتر جيوسياسي أو تغير في توقعات الفايدة بيخليه يدخل أو يخرج في وقت قصير جدا.
وده اللي ظهر بوضوح في آخر الأرقام لأن تعاملات العرب والأجانب في السوق الثانوية للدين الحكومي سجلت صافي بيع بقيمة 191.5 مليون دولار يوم الأربعاء بعد ما كانت سجلت صافي شراء بقيمة 149 مليون دولار يوم الثلاثاء وقبلها بيوم واحد خرجت استثمارات بقيمة 893 مليون دولار وده معناه إن السوق شهد تذبذب واضح جدا خلال 3 أيام فقط بسبب تجدد التوترات في المنطقة وتغير شهية المستثمرين للمخاطرة.
لكن هل الأرقام دي معناها إن المستثمرين الأجانب فقدوا الثقة في السوق المصرية؟
لأ طبعا.. لأن الصورة الكاملة مختلفة تماما ولو بصينا على شهر يونيو هنلاقي إن صافي شراء العرب والأجانب في السوق الثانوية للدين الحكومي وصل إلى 8.76 مليار دولار أما خلال الربع الثاني من 2026 فسجلت الأموال الساخنة صافي شراء 11.66 مليار دولار ومن بداية 2026 وصلت التدفقات إلى حوالي 11.6 مليار دولار وده معناه إن رغم التحركات اليومية اللي فيها بيع وشراء إلا إن الاتجاه العام لسه بيدعم السوق المصرية.
