مش غرامة وبس.. امتى مخالفة المرور تحبسك؟

لو فاكر إن مخالفة المرور آخرها غرامة؟.. خلي بالك، فيه مخالفات ممكن توصلك للحبس 90 يوم.

كتير من السواقين فاكرين إن أي مخالفة هتخلص بدفع فلوس وخلاص، لكن قانون المرور حدد مخالفات اعتبرها جرائم.

وعقوبتها ممكن توصل للحبس لمدة 3 شهور، أو غرامة، أو الاتنين مع بعض، ولو كررتها خلال 6 شهور العقوبة بتتشدد
من أخطر المخالفات إنك تسوق بسرعة أعلى من المسموح، أو بعربية أو رخصة منتهية أو غير مرخصة، أو تستخدم لوحات معدنية مزورة أو معدلة
أو تسوق بعربية فيها أعطال خطيرة خصوصًا الفرامل.

 كمان تعمد تعطيل حركة المرور، أو تزوير بيانات الترخيص، أو وضع إعلانات على العربية من غير تصريح.

أو إدارة مدرسة تعليم قيادة بدون ترخيص، كلها مخالفات ممكن تعرضك للمساءلة الجنائية.

علشان كده قبل ما تنزل بعربيتك، اتأكد إن الرخصة سارية، والعربية حالتها الفنية سليمة، والتزم بقواعد المرور، لأن مخالفة واحدة ممكن تكلفك أكتر بكتير من مجرد غرامة.