استثمارات بـ1.6 مليار دولار.. مصر بتحضر لمشروع ضخم لتحلية المياه
مصر بتحضر لمشروع ضخم لتحلية المياه.. والسؤال هنا، ليه الدولة فجأة بتتكلم عن مليارات الدولارات في محطات التحلية؟، وهل فعلاً إحنا داخلين على مرحلة جديدة في ملف المياه؟..
الحكومة أعلنت أنها بتستعد تطرح مناقصة لإنشاء محطتين عملاقتين لتحلية مياه البحر في بورسعيد والسويس، باستثمارات توصل لـ1.6 مليار دولار، يعني كل محطة لوحدها هتكلف أكتر من 800 مليون دولار، وده رقم يوضح إننا مش بنتكلم عن مشروع عادي، لكن عن واحد من أكبر مشروعات البنية التحتية في مصر.
طيب ليه بورسعيد والسويس تحديدًا؟، لأن المحافظتين من أهم المناطق الساحلية، وكمان بيشهدوا توسعات عمرانية وصناعية كبيرة، واحتياجاتهم للمياه بتزيد بشكل مستمر، والدولة بقت شايفة أن الاعتماد على مصادر المياه التقليدية لوحدها مش هيكون كفاية في المستقبل، وبالتالي لازم يكون فيه بدائل.
السؤال الأهم، المحطات دي هتنتج قد إيه؟.. الأرقام بتقول إن كل محطة هتنتج ما بين 800 ألف لمليون متر مكعب مياه محلاة يوميًا.. تخيل الرقم ده! ده معناه ملايين اللترات من المياه كل يوم، تقدر تخدم مدن كاملة ومشروعات صناعية وسياحية ضخمة.
لكن فيه نقطة مهمة جدًا، الحكومة مش هتنفذ المشروعات دي لوحدها، لكنها هتعتمد على نظام الشراكة بين القطاعين العام والخاص، أو اللي معروف بـPPP. يعني شركات عالمية هتدخل تمول وتنفذ وتشغل المحطات، والدولة تستفيد من الخبرة والتمويل في نفس الوقت.
طيب مين الشركات اللي داخلة المنافسة؟.. القائمة فيها أسماء كبيرة جدًا، زي أكوا باور السعودية، وسكاتك النرويجية، وكمان تحالف تقوده مجموعة حسن علام المصرية، والسؤال هنا.... مين فيهم هيكسب تنفيذ المشروعين؟ وهل هنشوف منافسة قوية على العقود دي؟
الموضوع كمان مش واقف عند بورسعيد والسويس، الحكومة أعلنت أنها بتحضر 19 مشروع جديد بالشراكة مع القطاع الخاص خلال أقل من سنة، بإجمالي استثمارات تقرب من 6 مليارات دولار، يعني ملف المياه بقى جزء من خطة أكبر لتطوير البنية التحتية.
وفي نفس الوقت، فيه محطات تانية شغالة عليها الحكومة، زي محطة العلمين الجديدة باستثمارات حوالي 170 مليون دولار، ومحطة المنطقة الاقتصادية لقناة السويس باستثمارات 600 مليون دولار وطاقة إنتاجية 500 ألف متر مكعب يوميًا.
طيب ليه الدولة بتركز بقوة على التحلية؟.. لأن عدد السكان بيزيد، والمدن الجديدة بتكبر، والصناعة والسياحة محتاجين كميات ضخمة من المياه، وبالتالي لازم يبقى فيه مصادر جديدة ومستدامة بعيدًا عن الضغط على الموارد التقليدية.
كمان التحلية بقت من أهم الحلول اللي دول كتير حوالينا بتعتمد عليها، خصوصًا الدول الساحلية، ومصر عندها سواحل طويلة على البحرين الأحمر والمتوسط، وده بيديها فرصة كبيرة تستفيد من التكنولوجيا دي.
