بعد انخفاضه عالميا.. ليه أسعار البنزين مش بتنزل في مصر؟
هو مش سعر البترول العالمي نزل؟ طب ليه البنزين والسولار لسه منزلش؟ الحقيقة إن الموضوع مش بالحسابات البسيطة اللي ناس كتير فاكراها.
المهندس أسامة كمال، وزير البترول الأسبق، قال إنه مش متوقع يحصل خفض في أسعار البنزين والسولار دلوقتي، لأن متوسط أسعار النفط خلال الفترة اللي فاتت لسه أعلى من السعر اللي الدولة حاسباه في الموازنة، وكمان السوق العالمي لحد دلوقتي مش مستقر.
وقال إن سعر الوقود في مصر مش بيتحدد على أساس سعر برميل البترول بس، لكن فيه عوامل تانية زي تكلفة الإنتاج، والاستيراد، والعقود اللي الدولة بتبرمها لتوفير احتياجات السوق، وعلشان كده أي انخفاض عالمي مش بيظهر فورًا عندنا.
وقال كمان إن الدولة ما زالت بتتحمل جزء من تكلفة الوقود، لأن التكلفة الحقيقية أعلى من السعر اللي المواطن بيدفعه، وبالتالي أي قرار بتخفيض الأسعار محتاج الأول استقرار في أسعار النفط العالمية لفترة، وبعدها لجنة التسعير بتراجع الموقف وتقرر إذا كان فيه تغيير ولا لأ.
