بـ ٥ جنيه بس هتركب المواصلات.. هيئة النقل العام بتفاجئ الكل بأرخص تذكرة
بـ ٥ جنيه بس هتركب المواصلات.. أرخص تذكرة أتوبيس في مصر خلاص بقت حقيقة.
هيئة النقل العام بالقاهرة أعلنت عن مفاجأة من العيار الثقيل هتبدأ تطبقها رسميا من يوم ١٥ يوليو الحالي، وهي نظام تقسيم سعر تذكرة الأتوبيس لأول مرة بناء على عدد المحطات اللي هتركبها
النظام ده معمول مخصوص للمواطنين اللي معاهم كروت الدفع المسبق عشان يشجعوا الناس على المنظومة الإلكترونية ويسهلوا الحركة.
الحسبة الجديدة متقسمة تذكرة كاملة، ونصف تذكرة، وربع تذكرة حسب مسافة رحلتك، يعني لو هتركب مسافة قصيرة في الأتوبيسات العادية هتدفع ربع تذكرة بـ ٥ جنيه بس، والنص تذكرة بـ ٨ جنيه، والتذكرة الكاملة بـ ١٣ جنيه، أما الأتوبيسات المكيفة فالتذكرة الكاملة بـ ٢٥ جنيه والنص تذكرة بـ ١٨ جنيه
بس خلي بالك المنظومة دي فيها تركتين لازم تعرفهم عشان تستفاد منها صح
الركاب اللي مش معاهم كارت دفع مسبق وهيدفعوا كاش مش هيستفادوا من الميزة دي نهائي، وهيتحاسبوا على قيمة التذكرة كاملة للخط كله حتى لو هيركبوا محطة واحدة بس.
عشان كده الهيئة قررت توزع كروت الدفع المسبق على الجمهور مجانا ومن غير ما تدفع ثمن الكارت فورا، كل اللي عليك إنك بتشحن الكارت بأي مبلغ بيبدأ من ٥٠ جنيه كحد أدنى، وبعدين ثمن الكارت نفسه اللي هو ٨٠ جنيه بيتخصم على دفعات بسيطة بواقع ٥ جنيه مع كل عملية شحن جديدة بتعملها بعد كده.
