فرصة جديدة للسكن.. إزاي تحجز شقة تعاونيات 2026؟
لو بتفكر تحجز شقة في تعاونيات البناء والإسكان، اسمع التفاصيل قبل ما تقدم، وزارة الإسكان فتحت الحجز لوحدات جديدة في مدن مختلفة، لكن في شروط لازم تعرفها.
أولها يكون سنك 21 سنة أو أكتر، وتكون مصري، وما تكونش أنت أو زوجتك أو أولادك القُصر استفدتوا قبل كده من إسكان اجتماعي أو تعاوني.
الحجز لوحدة واحدة لكل أسرة، والتخصيص هيكون بالقرعة، إلا لو سددت كامل ثمن الوحدة، والمقدم بيبدأ من 100 ألف ويوصل لـ340 ألف جنيه، والتقسيط على 5 أو 7 أو 10 سنين حسب المدينة.
الوحدات مطروحة في القاهرة الجديدة، أكتوبر، بدر، العاشر، السويس، بورسعيد، العريش و15 مايو، بمساحات من 47 لحد 155 متر.
التقديم مستمر لحد 30 يوليو، وكراسة الشروط متاحة في مقرات الهيئة وكمان إلكترونيًا، وقبل ما تدفع أي مبلغ، راجع الشروط والأسعار كويس واختار المدينة اللي تناسب ميزانيتك واحتياجاتك.
ومتنساش تقارن بين الأسعار وأنظمة السداد، وتتأكد من استيفاء كل الأوراق المطلوبة قبل الحجز عشان تزود فرصك بالقبول.
