الصين تفتح خزائنها لمصر.. مليارات جديدة و50 شركة على خط الاستثمار
في عالم الاقتصاد مفيش دولة بتحط مليارات الدولارات في بلد تاني من غير سبب قوي.. ومفيش مستثمر بيفتح مصنع جديد إلا وهو شايف فرصة كبيرة للربح.. وعشان كده لازم نسأل طب اللي خلا الصين تزود استثماراتها في مصر؟ وليه أكتر من 50 شركة صينية بتتفاوض دلوقتي على دخول السوق المصري؟ وهل الاستثمارات دي هتنعكس على فرص الشغل والصادرات والدولار؟
الواقع بيقول إن الاستثمارات الصينية في مصر دخلت مرحلة جديدة تماما خلال 2026 بعد ما وصل حجم الاستثمارات الجديدة خلال النص الأول من السنة لما بين 1.5 و2 مليار دولار والرقم ده مش جاي من مشروع واحد أو صفقة واحدة لكنه نتيجة توسعات متتالية لشركات صينية شغالة بالفعل في مصر وده معناه إن المستثمر اللي جرب السوق المصري واشتغل فيه وحقق نتائج كويسة قرر يكبر استثماراته بدل ما يخرج منها ودي من أهم الرسائل اللي أي اقتصاد بيحب يوصلها للمستثمرين لأن التوسع في المشروعات القائمة بيعتبر دليل ثقة أكبر من دخول مستثمر جديد لسه بيجرب السوق.
طيب هل الصين اكتفت بالمشروعات اللي عندها في مصر؟
لا طبعا.. لأن المفاوضات دلوقتي شغالة مع أكتر من 50 شركة صينية جديدة علشان تنفذ استثمارات خلال الفترة الجاية وتم بالفعل توقيع اتفاقيات مع حوالي تلت الشركات المستهدفة ولسه المفاوضات مستمرة مع الباقي وده معناه إن فيه موجة استثمارات جديدة ممكن تدخل السوق المصري خلال الشهور المقبلة لو المفاوضات دي اتحولت لمشروعات على الأرض.
وده بيفتح سؤال مهم ليه الشركات الصينية اختارت مصر في التوقيت ده بالذات؟
هنا بتبدأ من الموقع الجغرافي لأن مصر مش مجرد سوق فيه أكتر من 100 مليون مستهلك لكنها كمان بوابة ضخمة للتصدير لأفريقيا وأوروبا والشرق الأوسط وكمان عندها اتفاقيات تجارة حرة مع أسواق كبيرة جدا وده بيدي أي مصنع بيتبني في مصر فرصة إنه يصدر منتجاته برسوم جمركية أقل أو من غير جمارك في أسواق كتير ودي ميزة صعب أي دولة في المنطقة تنافسها فيها.
كمان المنطقة الاقتصادية لقناة السويس بقت واحدة من أهم عوامل الجذب للمستثمر الصيني لأن المنطقة دي بتقدم حوافز استثمارية وبنية تحتية حديثة ومواني قريبة من خطوط التجارة العالمية وده بيخلي تكلفة الإنتاج والشحن أقل وسرعة الوصول للأسواق العالمية أكبر وعلشان كده معظم الشركات الصينية اللي داخلة مصر بتختار المنطقة الاقتصادية لقناة السويس كمقر رئيسي لمصانعها.
طيب الصين جاية تستثمر في إيه بالظبط؟
الحقيقة إن التركيز الأكبر دلوقتي على القطاع الصناعي لأن بكين شايفة إن مصر تقدر تتحول لقاعدة تصنيع وتصدير مش مجرد سوق للبيع وعلشان كده بنلاقي استثمارات كبيرة في الملابس الجاهزة والغزل والنسيج والصناعات المغذية وصناعة الحقائب وكمان صناعات تانية مرتبطة بسلاسل التوريد العالمية ودي قطاعات بتوفر فرص عمل كبيرة وبتزود الصادرات وبتدخل عملة أجنبية للبلد.
وليه الشركات الصينية بتنقل جزء من إنتاجها لمصر بدل ما تصنع في الصين نفسها؟
السبب إن الشركات الصينية بقت بتواجه قيود ورسوم في بعض الأسواق الأوروبية والأمريكية وبالتالي التصنيع داخل مصر بيديها فرصة إنها تصدر من خلال الاتفاقيات التجارية اللي وقعتها مصر مع دول كتير وده بيخلي المنتج يوصل للأسواق دي بشكل أسهل وأقل تكلفة وعلشان كده المستثمر الصيني مش جاي يبيع للمستهلك المصري بس لكنه جاي يستخدم مصر كمركز إنتاج وتصدير للعالم.
وإيه فايدة ده لمصر؟
الفايدة كبيرة لأن أي مصنع جديد معناه وظائف جديدة وتحريك للصناعة المحلية وزيادة في الطلب على الموردين المصريين ونقل جزء من التكنولوجيا والخبرات الصناعية وكمان زيادة في الصادرات اللي بتدخل دولار للاقتصاد المصري وكل ما الصادرات زادت كل ما الضغط على العملة الأجنبية قل وكل ما الاقتصاد بقى أقوى وقدر يحقق نمو مستدام.
