سيجارة هتسحب رخصتك وتدفعك غرامة بالآلاف.. ايه الحكاية

سيجارة هترميها من شباك العربية ممكن تسحب رخصتك سنة كاملة.

قانون المرور الجديد مابقاش فيه هزار وكل الرادارات الحديثة في الشوارع دلوقتي بتلقط أي حد يرمي عقب سيجارة أو كوباية قهوة من الشباك وهو سايق.

​الموضوع مش مجرد نظافة وبس.. القانون حدد عقوبات صارمة تهم كل سواق وهي إنك لو رميت أي مخلفات من عربيتك هتدفع غرامة أولها 5000 جنيه وبتوصل لحد 15000 جنيه..

مش بس كده.. لو كررت الحركة دي تاني خلال 6 شهور الغرامة دي بتتضاعف فورا.. ولو عملتها للمرة الثالثة في نفس السنة رخصتك بتتسحب منك لمدة سنة كاملة.

نفس العقوبة دي والغرامه الكبيرة بتطبق كمان لو عربيتك شكمانها صوته عالي ومزعج أو بيطلع منها دخان وعادم كثيف بيلوث البيئة ويضر بصحة الناس في الشارع.

وعلى فكرة الداخلية خلاص نشرت منظومة رصد إلكترونية متطورة جدا على كل المحاور بتصور وبترصد السلوكيات دي بدقة عالية.