عايز تحجز شقة في الإسكان التعاوني؟ اعرف الأوراق المطلوبة قبل فتح باب الحجز

لو ناوي تحجز وحدة سكنية ضمن مشروع الإسكان التعاوني في المدن الجديدة، يبقى لازم تجهز أوراقك من دلوقتي عشان متتفاجئش وقت التقديم.

المشروع مطروح في 8 مدن جديدة، وشهد اهتمام كبير من المواطنين الباحثين عن فرصة سكن مناسبة بأسعار وأنظمة سداد ميسرة.

طيب إيه أهم الأوراق المطلوبة؟

أول حاجة صورة سارية من بطاقة الرقم القومي للمتقدم والزوج أو الزوجة لو متزوج.

كمان هتحتاج شهادة إثبات الدخل أو مفردات المرتب، سواء كنت موظفًا في جهة حكومية أو قطاع خاص أو صاحب نشاط خاص.

ولو متزوج، هيكون مطلوب قسيمة الزواج، وفي بعض الحالات شهادة ميلاد الأبناء إن وجدت.

كمان لازم تقدم إيصال مرافق حديث سواء كهرباء أو مياه أو غاز لإثبات محل الإقامة الحالي.

ومتنساش الاحتفاظ بإيصال سداد مقدم الحجز وكراسة الشروط لأنهم من أهم المستندات المطلوبة عند استكمال الإجراءات.

الهدف من المستندات دي هو التأكد من استيفاء شروط التقديم وتحديد أولوية الاستحقاق طبقًا للضوابط المعلنة.

لو بتفكر تقدم، جهز ورقك بدري عشان تكون جاهز أول ما يبدأ الحجز رسميًا.