عايز تحجز شقة؟.. خطوات إنشاء حساب على موقع التعمير والإسكان في دقائق
لو بتفكر تحجز وحدة سكنية جديدة في الطروحات الحكومية، فأول خطوة لازم تعملها هي إنشاء حساب على موقع بنك التعمير والإسكان، لأنه المنصة الرسمية اللي من خلالها بيتم التقديم والحجز وسداد مقدمات الوحدات.
الخطوة الأولى هي الدخول إلى الموقع الإلكتروني الخاص بالحجز، وبعدها اختيار إنشاء حساب جديد.
هنا هتحتاج تدخل مجموعة من البيانات الأساسية زي الرقم القومي، الاسم بالكامل، البريد الإلكتروني ورقم الهاتف المحمول.
بعد كده هيتم إرسال كود تحقق على الهاتف أو البريد الإلكتروني للتأكد من صحة البيانات، وبعد تفعيل الحساب تقدر تسجل الدخول وتستكمل باقي المعلومات المطلوبة.
المرحلة التالية بتشمل رفع صورة بطاقة الرقم القومي سارية، وإدخال بيانات محل الإقامة والحالة الاجتماعية وبعض المعلومات الأخرى المطلوبة ضمن إجراءات التسجيل.
بعد الانتهاء من إنشاء الحساب، تقدر تتابع المشروعات المطروحة، وتقرأ كراسة الشروط الخاصة بكل مشروع، وتشوف الأسعار وأنظمة السداد وشروط التقديم قبل اتخاذ قرار الحجز.
ولو قررت التقديم، هتقوم برفع المستندات المطلوبة وسداد جدية الحجز أو مقدم الحجز إلكترونيًا وفقًا للشروط المعلنة لكل مشروع.
أهمية إنشاء الحساب مبكرًا إنك بتكون جاهز فور الإعلان عن أي طرح جديد، خصوصًا إن بعض المشروعات بتشهد إقبالًا كبيرًا خلال الساعات الأولى من فتح باب الحجز.
وخلال السنوات الأخيرة، أصبحت أغلب إجراءات حجز الوحدات السكنية تتم بشكل إلكتروني بالكامل، بداية من التسجيل وحتى متابعة نتائج التخصيص، وده وفر وقت ومجهود كبير على المواطنين.
يعني لو ناوي تحجز شقة في أي طرح جديد، أول حاجة تعملها دلوقتي هي إنشاء حسابك على موقع التعمير والإسكان وتجهيز أوراقك، علشان تكون مستعد بمجرد فتح باب الحجز.
