خطوة كبيرة في الطاقة.. أوبليسك تضيف 500 ميجاوات لمصر خلال أسابيع

هل تنجح مصر فعلًا في الوصول لـ45% طاقة متجددة خلال عامين بس؟، وهل بطاريات التخزين هتكون الحل السحري لمشكلة انقطاع إنتاج الطاقة الشمسية ليلًا؟، وإزاي مشروع أوبليسك هيأثر على استقرار الكهرباء خلال الصيف؟، وهل مشروع إنرجي فالي هيخلي مصر من أكبر منتجي الطاقة النظيفة في المنطقة؟، وهل التوسع في الطاقة المتجددة هيقلل استهلاك الغاز ويوفر مليارات الدولارات؟

في الوقت اللي العالم كله بيدور على بدائل للطاقة التقليدية، مصر بتسرع خطواتها بقوة نحو الاعتماد على الطاقة المتجددة، من خلال مجموعة ضخمة من المشروعات اللي بيتم تنفيذها حاليًا في مجالات الطاقة الشمسية والرياح وتخزين الكهرباء.

أحدث التحركات كانت خلال اجتماع الرئيس عبد الفتاح السيسي مع رئيس الوزراء الدكتور مصطفى مدبولي ووزير الكهرباء الدكتور محمود عصمت، لمتابعة موقف مشروعات الطاقة المتجددة وتدعيم الشبكة القومية للكهرباء.

خلال الاجتماع، تم استعراض موقف محطة "أوبليسك" للطاقة الشمسية، واللي دخلت مرحلتها الأولى الخدمة بالفعل بقدرة 500 ميجاوات، بالإضافة إلى محطة تخزين طاقة مرتبطة بيها بسعة 200 ميجاوات ساعة، وتم ربطها بالشبكة الكهربائية مع بداية العام الجاري.

لكن المشروع مش هيقف عند كده، لأن المرحلة الثانية من محطة أوبليسك بقدرة إضافية 500 ميجاوات دخلت مراحلها الأخيرة، ومن المنتظر ربطها بالشبكة خلال أسابيع قليلة، وده معناه إضافة قدرات جديدة للشبكة القومية قبل ذروة استهلاك الصيف.

وزير الكهرباء أوضح كمان أن الدولة شغالة على تنفيذ 105 مشروعات ضمن المرحلة الثانية من خطة تدعيم الشبكة القومية للكهرباء، بالتوازي مع التوسع في ربط مشروعات الطاقة الشمسية وطاقة الرياح المخطط دخولها الخدمة خلال عام 2027.

الهدف الأساسي من كل المشروعات دي هو رفع مساهمة الطاقة المتجددة في مزيج الكهرباء المصري إلى 45% خلال العامين الجايين، وده رقم ضخم بيعكس حجم التحول اللي بيحصل في قطاع الطاقة المصري.

واحدة من أهم النقاط اللي تم التركيز عليها خلال الاجتماع كانت بطاريات تخزين الطاقة، لأن التحدي الأكبر للطاقة الشمسية والرياح مش الإنتاج فقط، لكن القدرة على تخزين الكهرباء واستخدامها وقت الحاجة، عشان كده الدولة بتتوسع بقوة في إنشاء محطات التخزين سواء المرتبطة بالشبكة أو المستقلة.

كمان تم استعراض الموقف التنفيذي لمشروع "وادي الطاقة" أو "إنرجي فالي"، واللي بيعتبر واحد من أكبر مشروعات الطاقة النظيفة المتكاملة في العالم، المشروع بيستهدف إنتاج 1.7 جيجاوات من الطاقة الشمسية في محافظة المنيا، مدعومة بأنظمة بطاريات تخزين عملاقة بسعة إجمالية تصل إلى 4 جيجاوات ساعة موزعة بين المنيا وقنا والإسكندرية.

الأهم كمان أن الدولة بتركز على توطين الصناعات المرتبطة بالطاقة المتجددة، سواء تصنيع المكونات أو المعدات أو أنظمة التخزين، بهدف تعزيز أمن الطاقة وتقليل الاعتماد على الاستيراد وخلق فرص عمل جديدة.