إزاي تبيع شقة الاسكان.. خطوات وشروط نقل ملكية شقة السكن الاجتماعي
ازاي تبيع شقة الاسكان.. لو أنت من محدودي الدخل وحصلت قبل كده على شقة في مشروع سكن لكل المصريين أو اللي كان معروف زمان باسم الإسكان الاجتماعي وعايز تبيع الشقة أو تنقل ملكيتها لحد تاني ركز معايا كويس.
صندوق الإسكان الاجتماعي وفر الخدمة دي بشكل إلكتروني تماما وسهل الموضوع جدا من غير ما تروح مقر الصندوق.
بس قبل أي حاجة فيه شرط أساسي ومهم جدا لازم يكون مر على استلامك للشقة سبع سنين كاملة والخدمة دي متاحة كمان للناس اللي عملت سداد معجل تمن الوحدة.
الصندوق خصص موظف في كل جهاز مدينة أو مديرية إسكان عشان يستقبل الطلبات دي ويسهل الإجراءات.
وعشان تعمل نقل الملكية صح فيه أوراق لازم تجهزها أولها صورة العقد لو كاش أو مخالصة البنك لو تمويل عقاري وصورة محضر الاستلام وعقد البيع وصور بطاقات الرقم القومي ليك وللشخص اللي هتنقل ليه الملكية.
وفي حالة وفاة صاحب الشقة الورثة بيجيبوا إعلام وراثة وصور بطاقاتهم وموافقة النيابة الحسبية لو فيه قصر.
