خدمات مالية غير مسبوقة.. إزاي تستغل هدايا الشمول المالي وتفتح حسابك مجانا
إزاي تقدر تستفيد من كل الخدمات البنكية والمصرفية من غير ما تدفع مليم واحد رسوم؟ وإيه هي فعاليات الشمول المالي اللي بيطلقها البنك المركزي المصري طول السنة؟
وليه البنوك بتفتح أبوابها في الأوقات دي عشان تقدم هدايا ومميزات مجانية لكل المواطنين؟ وهل صحيح إنك بتقدر تفتح حساب بنكي وتطلع كارت ميزة مجاناً ومن غير حد أدنى لفتح الحساب؟
فعاليات الشمول المالي في مصر بيتم تنظيمها عدة مرات على مدار السنة بالتزامن مع مناسبات عالمية ووطنية زي اليوم العالمي للمرأة واليوم العالمي للشباب وعيد الفلاح وأسبوع الشمول المالي العربي.
وفي الفترات دي البنك المركزي بيصدر توجيهات ملزمة لجميع البنوك العاملة في مصر بتقديم خدمات محددة مجاناً تماماً
وأهم الخدمة دي هي إمكانية فتح حسابات جارية أو توفير لجميع المواطنين الجدد بدون دفع أي رسوم إدارية وبدون اشتراط وجود حد أدنى للمبلغ المودع في الحساب.
يعني بتقدر تفتح حسابك ببطاقة الرقم القومي بس وتخرج من البنك ومعاك كارت خصم مباشر مفعل وجاهز للاستخدام من غير ما تدفع أي مصاريف
المميزات مش بتقف عند فتح الحسابات بس فخلال فعاليات الشمول المالي البنوك بتتوسع في إصدار المحافظ الإلكترونية على الموبايل مجاناً وبتتيح الاشتراك في خدمات الإنترنت البنكي والموبايل بنكي بدون اشتراك شهري أو سنوي ده غير إمكانية الحصول على بطاقات مسبقة الدفع زي كارت ميزة مجاناً تماما.
والخدمات دي بتسمح للمواطن إنه يدير فلوسه ويحولها ويسدد كل فواتيره واشتراكاته وهو قاعد في بيته ومن غير ما يضطر يزور فرع البنك وكل التسهيلات دي بتهدف لجذب فئات جديدة من المجتمع وخاصة الشباب والستات وأصحاب المشروعات الصغيرة ومتناهية الصغر لداخل القطاع المصرفي الرسمي للاستفادة من مزايا الاقتصاد الرقمي الآمن والمستدام.
