الماكينات مفيهاش فلوس.. اول تحرك لمواجهة نقص السيولة في الاسواق قبل العيد

تروح تسحب فلوس من الـATM… يقولك الخدمة غير متاحة!
تجرب الماكينة اللي جنبها… فاضية.. ولو لقيت فلوس… تلاقي طابور آخره مش باين.

أزمة نقص السيولة رجعت تضرب ماكينات الصراف الآلي قبل عيد الأضحى، وده خلّى نائب في البرلمان يتقدم ببيان عاجل للحكومة والبنك المركزي.

النائب أشرف سعد سليمان قال إن مواطنين كتير اشتكوا من إن ماكينات الـATM في مناطق مختلفة مفيهاش فلوس، خصوصًا مع صرف المرتبات والمعاشات وزيادة مصاريف العيد.

والأزمة مش بس زحمة وطوابير…
دي كمان فتحت الباب لاستغلال الناس، بعد ما بعض الأشخاص بقوا ياخدوا مبالغ زيادة مقابل توفير كاش.

وطالب الحكومة والبنك المركزي بسرعة تغذية الماكينات بالسيولة الكافية، وتشديد الرقابة على البنوك وماكينات الصرف، عشان الأزمة ما تتكررش.

وكمان طالب بخطة واضحة للمواسم والأعياد، خصوصًا إن الضغط على الـATM بيزيد جدًا في الفترات دي.