ليه عداد الكهرباء بيسحب فلوس أول كل شهر؟.. اعرف الرسوم والخصومات اللي بتتفاجئ بيها

لو بتشحن عداد الكهرباء وبتتفاجئ إن الرصيد نقص قبل ما تستخدم أي حاجة.. فإنت مش لوحدك فيه رسوم ثابتة وخصومات بتتسحب تلقائي أول كل شهر، وناس كتير ما تعرفش سببها.

أول خصم بيكون رسوم خدمة العملاء، ودي بتختلف حسب شريحة استهلاكك، وبتبدأ من جنيه واحد وبتوصل لـ40 جنيه في بعض الحالات.
كمان فيه رسوم حكومية ثابتة زي: رسم تنمية موارد الدولة، ورسوم النظافة، ودي بتختلف حسب المنطقة اللي ساكن فيها.

ولو الشقة مقفولة ومفيش استهلاك؟ برضو فيه رسوم ثابتة حوالي 9 جنيهات بتتخصم شهريًا.. وفي معلومة ناس كتير ما تعرفهاش: لو رصيد العداد خلص بالليل أو في الإجازات، الكهرباء ما بتفصلش فورا!

العداد بيديك استهلاك بالسالب كأنه "بيقرضك" كهرباء مؤقتًا، وبعد أول شحنة بيسحب المديونية تلقائي بدون فوائد.
وده بيحصل: من 5 مساءً لـ10 صباحًا
وكمان يومي الجمعة والسبت
وفي الإجازات الرسمية والأعياد.
يعني لو لقيت الرصيد بيقل أول الشهر.. فده غالبًا بسبب الرسوم الثابتة اللي بتتخصم أوتوماتيك من العداد.