اللحمة بتخفيض 25%.. وزارة الزراعة تواجه الغلاء قبل العيد
اللحمة ارخص بربع سعرها.. وزير الزراعة أصدر توجيهات رسمية بضخ كميات ضخمة من اللحوم البلدية والمجمدة والسلع الأساسية بتخفيضات بتبدأ من ٢٥٪ يعني هتوفر ربع الثمن مقارنة بالأسواق الخارجية.
الوزارة أكدت على تطبيق أعلى معايير الجودة والرقابة عشان تضمن سلامة الأكل اللي داخل بيتك وبسعر مناسب جدا.
الخطة بتعتمد على شبكة منافذ واسعة جداً بتوصل لـ ٦٠٠ منفذ ثابت ومتنقل منتشرة بشكل جغرافي في كل المحافظات وموجودة في مقرات مديريات الزراعة والإصلاح الزراعي ومراكز البحوث عشان اللحوم والسلع ديه توصل لكل الناس.
وكمان تم التنسيق مع القطاع الخاص لضمان تدفق السلع بره القاهرة والإسكندرية ووصولها للأقاليم لمنع أي محاولات لرفع الأسعار بدون مبرر.
الوزير طمن الكل وأكد إن المخزون الاستراتيجي آمن تماماً ومفيش أي نقص هيحصل طوال أيام العيد سواء في اللحوم الحية المخصصة للأضاحي أو اللحوم المذبوحة يعني هتعيدوا وتنبسطوا بأسعار منافسة وفي المتناول.
