الأسعار قفزت قبل العيد.. ليه سعر كيلو الطماطم وصل فجأة لـ 60 جنيه؟
الطماطم اتجننت والكيلو وصل 60 جنيه.. بعد ما الناس فرحت بنزولها من فترة.. الطماطم رجعت تعلى تاني وفوجئنا بزيادة قوية خلت الكيلو يوصل في الأسواق من 40 لـ 6٠ جنيه..
فـ إيه اللي حصل فجأة في سوق الخضار؟
حسين أبو صدام نقيب الفلاحين كشف عن الأسباب الحقيقية وراء القفزة دي.. وقال إن السبب الأساسي هو "فواصل العروات" والمنطقة المحيرة بين موسمي الشتاء والصيف..
العروة دي بتكون حساسة جداً للموجات الحارة الشديدة اللي بنعيشها، وده أثر على حجم المحصول والمعروض في السوق.
الموضوع مش بس طقس.. النقيب وضح إن فيه عوامل تانية زودت الأزمة زي ارتفاع أسعار التقاوي والأسمدة وزيادة أجور العمالة وتكلفة النقل.. ده غير "حلقات الوسطاء" الكتير بين الفلاح والتاجر واللي بترفع السعر، بالإضافة للهدر اللي بيوصل لـ ٢٥٪ بسبب أساليب الجني البدائية وإصابة المحصول ببعض الآفات.
المفارقة هنا إن مصر من أكبر الدول المنتجة للطماطم في العالم، وبنصدر منها ومن مصنعاتها كميات ضخمة، لكن التصدير وقت ذروة فواصل العروات بيأثر سلبياً على السوق المحلي.
نقيب الفلاحين شايف إن الحل دلوقت في تقليل الاستهلاك شوية في الفترات الحرجة والتوسع في التصنيع المحلي وعمل بورصة سلعية تضمن استقرار الأسعار ومتحملش المستهلك أعباء زيادة
قولنا بقى كيلو الطماطم وصل كام عندك؟
