إلغاء نموذج 3.. التنمية المحلية ترفع الحماية عن 950 ألف عقار: بيتك مهدد بالازالة
انذار اخير ومافيش فرص تاني.. لو أنت واحد من اللي قدموا طلب تصالح على مخالفات البناء ومطمن فـخليني اقولك أن بيتك ممكن يرجع مهدد بالإزالة في أي لحظة.
الدكتورة منال عوض وزير التنمية المحلية كشفت عن وجود ٩٥٠ ألف ملف تصالح غير جاد والناس دي اكتفت بس بتقديم صورة بطاقة الرقم القومي وسكتت من غير ما تقدم باقي المستندات الجوهرية والرسومات الهندسية اللي نص عليها القانون.
الموضوع دخل في الجد والمراكز التكنولوجية بالمحافظات بدأت فعلاً تبعت خطابات رسمية تحذيرية على العناوين المسجلة لسرعة استكمال الورق والإجراءات المالية لكن الغريب إن النسبة الأكبر من المواطنين لسه نايمين في العسل ومفيش أي استجابة لحد دلوقت.
وعشان كدة الوزارة طلعت تحذر.. المتقاعس هيتم رفض طلبه فوراً وهيتلغي أثر نموذج ٣ نهائياً وده معناه ببساطة رفع الحماية القانونية المؤقتة عن عقارك وعودة تفعيل محاضر الإزالة وقطع المرافق فورا.
الفرصة لسه في إيدك والوزارة بتديك الإنذار الأخير.. الحق خذ أصل إيصال التقديم وأوراقك واجري على المركز التكنولوجي التابع ليه وقنن وضعك قبل ما تلاقي نفسك في مواجهة قرارات رادعة ما تعجبكش.
