4 مليارات جنيه للاستثمار في مشروعات كهرباء على ساحل البحر الأحمر.. خطة جديدة لمصر
إيه أهمية مشروع محطات المحولات في جبل الجلالة بالنسبة لمستقبل الطاقة في مصر؟، وليه الدولة اختارت منطقة الجلالة تحديدا لمشروعات طاقة الرياح؟، وإزاي محطات بجهد 220 و500 كيلوفولت هتفرق في كفاءة الشبكة القومية؟، وهل المشروع ده كافي لاستيعاب التوسع الكبير في مزارع الرياح؟، وإيه حجم العائد الاقتصادي المتوقع من استغلال طاقة الرياح في المنطقة دي؟
خطوة جديدة ومهمة بتحصل في قطاع الكهرباء في مصر، تحديدًا في منطقة جبل الجلالة على ساحل البحر الأحمر، واللي الدولة بدأت تتحرك فيها بشكل واضح علشان تحولها لنقطة محورية في إنتاج الطاقة المتجددة.
الشركة المصرية لنقل الكهرباء ناوية تطرح تنفيذ محطتين محولات كهرباء بجهد عالي جدًا 220 و500 كيلوفولت، بتكلفة ضخمة بتتراوح بين 3.5 و4 مليار جنيه، وده رقم بيعكس حجم المشروع وأهميته.. المحطتين دول دورهم مش بس نقل الكهرباء، لكن الأهم إنهم هيستوعبوا الطاقة اللي جاية من مشروع مزارع الرياح اللي بيتخطط له في نفس المنطقة.
إحنا مبنتكلمش عن مشروع واحد، لكن عن منظومة متكاملة، وهي رياح بتتولد على الجبل، ومحطات محولات بتنقل الطاقة دي مباشرة للشبكة القومية، ومن هناك تتوزع على مستوى الجمهورية..
المنطقة دي تحديدًا مميزة جدًا، لأن ارتفاع الجبل بيوصل لحوالي 1500 متر، وسرعة الرياح فيه ممكن توصل لـ15 متر في الثانية، وده بيخليها من أفضل المناطق في مصر لإنتاج طاقة الرياح بكفاءة عالية، خصوصًا مع قربها من مناطق زي الزعفرانة اللي تعتبر بالفعل من أهم مراكز طاقة الرياح في البلد.
الجولة اللي عملها وزيري النقل والكهرباء للموقع كانت بهدف التأكد على أرض الواقع من أفضل الأماكن لتنفيذ المشروع، ومراجعة المسارات الفنية لإنشاء المحطات وربطها بالشبكة، وده بيدل إن المشروع دخل مرحلة جدية من التنفيذ.
طيب ليه كل ده مهم؟.. لأن مصر حاليًا شغالة على تنويع مصادر الطاقة، وتقليل الاعتماد على الوقود التقليدي، والاتجاه بقوة للطاقة النظيفة زي الرياح والشمس، والمشروع ده جزء من الخطة دي، لأنه هيساعد في إنتاج كهرباء نظيفة ومستدامة بتكلفة تشغيل أقل على المدى الطويل.
كمان فيه جانب تكنولوجي مهم، لأن وزارة الكهرباء بتشتغل على إدخال التحول الرقمي في إدارة الشبكة، من خلال مراقبة وتحليل بيانات الطاقة وتحسين كفاءة التشغيل، وده بيخلي الشبكة أكثر استقرارًا وقدرة على استيعاب مصادر الطاقة الجديدة.
من الآخر كده، المشروع ده مش مجرد محطتين كهرباء، لكنه خطوة ضمن خطة أكبر لتحويل مصر لمركز إقليمي للطاقة، خصوصًا في مجال الطاقة المتجددة، ومع استغلال مناطق زي الجلالة بالشكل ده، إحنا بنتكلم عن مستقبل طاقة مختلف وأنضف وأكثر استدامة.
