سر اعتماد مصر على نفط الخليج رغم وجود النفط الليبي.. ما القصة؟
ليه مصر ما تعتمدش بشكل أكبر على النفط الليبي رغم إنه من أجود الأنواع عالميًا؟، وهل فعلًا جودة النفط أهم من توافقه مع المصافي؟ ولا العكس؟، وهل ممكن تطوير مصافي مصر يخليها تستفيد أكتر من النفط الخفيف زي الليبي؟، وليه النفط الأرخص أحيانًا بيكون أفضل اقتصاديًا من النفط الأغلى؟، وإزاي “مزيج الخامات” بيأثر على كفاءة إنتاج البنزين والسولار؟، وقد إيه استقرار الإمدادات بيأثر على قرارات استيراد النفط؟
في وسط التوترات اللي بتحصل في المنطقة ومشاكل الطاقة اللي بقت تضغط على كل الدول، رجع السؤال تاني، مصر بتجيب نفطها منين؟ وهل ممكن تعتمد على ليبيا بدل دول الخليج؟
هنا المفاجأة بقى، أن النفط الليبي فعلًا من أحسن أنواع النفط في العالم، بيتصنف “خفيف وقليل الكبريت”، يعني سهل التكرير وجودته عالية جدًا، وده بيخليه مطلوب في أوروبا بشكل كبير. لكن رغم كده، مش هو الخيار الأفضل لمصر!
ليه؟ لأن الموضوع مش جودة وبس، الموضوع له علاقة بالمصافي اللي عندك، أغلب مصافي مصر متصممة من زمان علشان تشتغل على نفط تقيل أو متوسط، زي اللي بييجي من دول الخليج، النوع ده أرخص، وكمان مناسب لطبيعة التشغيل جوه المصافي.
المصافي دي معتمدة على عمليات تكسير وتحويل معقدة علشان تطلع منتجات زي السولار والبنزين بكفاءة عالية، لما تدخل نفط خفيف زي الليبي، العمليات دي بتبقى أقل فاعلية، وده معناه إنك مش مستفيد من إمكانيات المصفاة بالكامل.
مش بس كده، كمان هيأثر على نوعية المنتجات اللي بتطلع، وممكن يقلل من المنتجات اللي فيها هامش ربح أعلى، وفي نفس الوقت أنت دافع فلوس أكتر في خام أغلى، يعني المعادلة مش في صالحك اقتصاديًا.
علشان كده، مصر بتلعبها بطريقة أذكى شوية، بتعتمد على فكرة “مزيج الخامات”، يعني تخلط أكتر من نوع نفط علشان تحقق أفضل توازن بين السعر والكفاءة، ساعتها ممكن تستخدم جزء صغير من النفط الليبي، لكن مش تعتمد عليه بشكل أساسي.
كمان في عامل مهم جدًا وهو الاستقرار، لأن دول الخليج بتوفر إمدادات ثابتة بعقود طويلة، وده بيدي أمان في التخطيط، على العكس، ليبيا أوقات كتير بيكون عندها مشاكل داخلية بتأثر على الإنتاج والتصدير.
طيب هل مصر بتستورد من ليبيا؟، اه بنستورد من ليبيا، بس في حالات معينة، زي لو حصلت أزمة في الشحن من الخليج أو مشاكل في مضيق هرمز، ساعتها بيبقى النفط الليبي حل سريع بسبب قربه الجغرافي.
لكن في النهاية، ده حل مؤقت مش دائم. يعني ببساطة، مش كل نفط حلو ينفعك، المهم إيه اللي يناسب مصنعك وظروفك.
