وفر فلوسك.. دليلك لتقليل فاتورة الكهرباء في البيت

في وقت الدولة بتتحرك فيه لترشيد استهلاك الطاقة، بقى مهم إن كل بيت يبدأ يراجع طريقة استخدامه للكهرباء لأن الفرق الحقيقي بيبدأ من عندك.
أول خطوة مهمة هي اختيار الأجهزة الصح.

الأجهزة اللي فيها تقنية الإنفرتر بتوفر استهلاك الكهرباء بشكل كبير، خصوصًا في التكييفات والثلاجات، وممكن تقلل الاستهلاك بنسبة توصل لـ 50%.

كمان لازم تبص على بطاقة كفاءة الطاقة قبل ما تشتري أي جهاز.. كل ما زادت علامة A+ كل ما الجهاز بيكون أوفر في الكهرباء.

وفي البيت نفسه، التفاصيل الصغيرة بتفرق جدًا.. زي فصل الشواحن والأجهزة وهي مش شغالة، واستخدام الإضاءة الموضعية بدل الإنارة الكاملة طول الوقت.

ومهم جدًا كمان مكان الأجهزة.. زي إن الثلاجة ما تكونش جنب مصدر حرارة، لأن ده بيزود استهلاك الكهرباء من غير ما نحس.

حتى السخان ليه دور.. اختيار سخان بعزل كويس بيخليه يحتفظ بالحرارة فترة أطول، وبالتالي يشتغل أقل ويوفر كهرباء أكتر.

يعني ترشيد الاستهلاك مش حرمان، ده ذكاء في الاستخدام، وفرق مباشر في الفاتورة كل شهر.