ازاي تطلع القيد العائلي أونلاين من غير ما تروح السجل المدني؟
لو محتاج تطلع قيد عائلي ومش عايز تقف في طوابير السجل المدني، دلوقتي تقدر تعمله أونلاين بسهولة جدًا.
كل اللي محتاجه شوية أوراق بسيطة:
صورة بطاقة الرقم القومي ليك سارية،
وشهادات ميلاد الأبناء تكون مميكنة،
وكمان صورة بطاقة الزوج أو الزوجة،
ولو متجوز أو مطلق هتحتاج وثيقة زواج أو طلاق مميكنة، ولو في حالات وفاة لازم تقدم شهادات الوفاة، وطبعًا نموذج 40.
بس خليك واخد بالك من شوية شروط مهمة:
كل البيانات لازم تكون محدثة،
وحالتك الاجتماعية تكون مكتوبة في البطاقة، وكمان لازم تكون قريب درجة أولى أو تانية للشخص اللي بتطلع له القيد.
طيب بتعمله ازاي؟ بتدخل على موقع وزارة الداخلية، تختار الأحوال المدنية، تسجل دخول أو تعمل حساب جديد، وبعدين تختار القيد العائلي، وتدخل كل بياناتك وبيانات الأسرة بدقة، وترفع المستندات المطلوبة،
وفي الآخر تدفع الرسوم أونلاين.
وبكده تقدر تستلم القيد يا إما لحد البيت، يا إما من أقرب سجل مدني ليك.. ببساطة الموضوع بقى أسهل بكتير من زمان.
