أنبوبة البوتجاز بـ400 جنيه.. أول رد من البترول بعد أزمة سوهاج وقنا
في الوقت اللي فيه شكاوى كتير من بعض المواطنين في سوهاج وقتا بسبب ارتفاع سعر أنبوبة البوتاجاز في السوق السوداء، واللي وصل حسب كلام الأهالي لـ400 جنيه بعد ما كان حوالي 350 جنيه بس، خرجت وزارة البترول والثروة المعدنية بتوضيح مهم علشان تطمّن الناس.
الوزارة أكدت إن أسطوانات البوتاجاز متوفرة بكميات كافية في جميع المحافظات، وإن اللي بيتقال عن وجود نقص في الإمدادات في بعض الأماكن غير صحيح.
كمان وضحت إن فيه متابعة مستمرة على مدار الساعة من خلال غرف العمليات التابعة للوزارة والهيئة المصرية العامة للبترول، بالتنسيق مع شركات التوزيع، علشان مراقبة حركة نقل وتوزيع المنتجات البترولية والتأكد إنها بتوصل لكل المناطق بدون مشاكل.
الوزارة قالت إن كل محافظة بتحصل على حصتها المقررة من أسطوانات البوتاجاز بشكل منتظم، مع ضخ كميات إضافية في الفترات اللي بيزيد فيها الطلب، خصوصًا خلال شهر رمضان اللي بيشهد زيادة في الاستهلاك.
كمان قالت إن مصانع تعبئة البوتاجاز ومستودعات التوزيع شغالة بشكل طبيعي على مستوى الجمهورية، مع متابعة دقيقة لعمليات نقل الغاز للمصانع، ثم نقل الأسطوانات المعبأة لمستودعات البيع عبر سيارات التوزيع، علشان تفضل الإمدادات متوفرة للمواطنين بشكل مستمر.
وفي الوقت نفسه، بيطالب عدد من المواطنين بتشديد الرقابة على الأسواق ومواجهة أي محاولات لاحتكار الأسطوانات أو بيعها في السوق السوداء، خاصة مع الشكاوى المتداولة من ارتفاع الأسعار في بعض المناطق.
