ما تخافوش على مصر.. تحركات قوية من السيسي حمت اقتصاد البلد
هو ليه الرئيس السيسي بيتكلم بثقة ويقين إن اقتصاد مصر في منطقة الأمان برغم كل العواصف والحرائق اللي بتحصل حوالينا في المنطقة؟ وإيه السر اللي خلى مصر واقفة صلبة ومستقرة في وقت العالم كله فيه بيمر بأزمات اقتصادية وأمنية غير مسبوقة؟ وإزاي الدولة المصرية قدرت تجهز نفسها للأيام الصعبة دي من سنين طويلة؟ وإيه هي الخطوات الاستباقية اللي الرئيس اشتغل عليها عشان يأمن احتياجات المصريين من الأكل والشرب والوقود قبل ما الأزمة العالمية تفرض كلمتها ؟
الموضوع مش كلام ولا شعارات ولكن رؤية للمستقبل وتخطيط بدأ من اليوم الأول لبناء جمهورية جديدة قادرة إنها تمتص الصدمات وتعدي بكل ثبات لبر الأمان وبرغم جسامة التحديات اللي بتواجهنا النهاردة إلا إن الشهادات الدولية والمؤسسات المعنية بتؤكد إننا في المسار الصح وإن اللي اتعمل في السنين اللي فاتت هو اللي حامينا النهاردة من سيناريوهات مرعبة وقعت فيها دول تانية كانت بتفتكر إنها بعيد عن الخطر.
الرئيس السيسي في كلمته الأخيرة خلال ندوة القوات المسلحة النهاردة الاثنين طمن كل المصريين إن اقتصادنا في منطقة الأمان وده مكنش هيحصل لولا إن الدولة اشتغلت بجدية على بناء بنية تحتية قوية وتنويع مصادر الدخل وتأمين احتياطي استراتيجي من كل السلع الأساسية وبرغم إننا تكبدنا خسائر ضخمة قاربت على 10 مليارات دولار من إيرادات قناة السويس بسبب الحرب في غزة منذ أكتوبر 2023 إلا إن الرؤية المصرية كانت دايمة بتعتمد على فكرة بناء مخزون استراتيجي وتأمين بدائل لوجستية تخلي الدولة متتأثرش بشكل مباشر وكبير بأي اضطراب يحصل في سلاسل الإمداد وده هو الفكر اللي خلى الرئيس يتكلم بثقة ويقول إننا برغم كل الظروف دي لسه واقفين على رجلينا وبنحقق نجاحات اقتصادية بشهادة الجميع لأن الشغل اللي اتعمل في تطوير الطرق والموانئ وزيادة الرقعة الزراعية وتوطين الصناعة كان هدفه الأساسي هو اليوم ده إننا نكون مكتفين ذاتيا وقادرين نواجه الصعاب.
الثقة دي جاية كمان من إن الدولة المصرية كانت شايفة المستقبل بوضوح وعرفت إن المنطقة داخلة على منعطف تاريخي ودقيق وعشان كدة الرئيس السيسي كان بيأكد دايما إن الأمن القومي مرتبط بقوة الاقتصاد وبالقدرة على توفير احتياجات المواطن من غير الاعتماد الكلي على الاستيراد والنهاردة واحنا بنشوف تداعيات الحروب في المنطقة وآثارها الاقتصادية والأمنية الجسيمة بنعرف قيمة المشروعات القومية اللي اتنفذت والقرارات الجريئة اللي اتخدت في وقتها عشان تحمي مقدرات الشعب وتصون أمنه والرسالة المصرية للعالم النهاردة هي إن مصر دولة قوية بجيشها واقتصادها ووعي شعبها وإننا بنمد إيد السلام وبندعو للتفاوض والحوار لإننا عارفين إن الاستقرار هو اللي بيبني الشعوب وإن التفاهم هو اللي بيضمن الأمن لكل الدول وده اللي مصر بتشتغل عليه بكل إخلاص عشان تفضل دايمة في منطقة الأمان ومحافظة على ريادتها واستقرارها مهما كانت التحديات.
