اشتري عربيتك بأقل من سعر السوق.. كل تفاصيل مزاد وزارة المالية

عايز تشتري عربية بسعر أقل من السوق؟
ممكن الفرصة تكون جاية من مزاد رسمي تابع لوزارة المالية.

الهيئة العامة للخدمات الحكومية أعلنت عن مزاد علني كبير في مارس 2026، لبيع عربيات وبضائع تابعة لنيابات وجهات حكومية وجمارك.. بأسعار بتبدأ بالمزايدة.

المزاد هيكون يومين في نادي الجيزة الرياضي: 17 مارس مخصص لبيع العربيات، و18 مارس لبيع البضائع.

طيب إيه العربيات المعروضة؟ في ملاكي، ميكروباص، بيك أب، نقل، أتوبيسات، موتوسيكلات وتروسيكلات.

والماركات متنوعة جدًا: بيجو، فيات، سوزوكي، إيسوزو، شيفروليه، لادا، دايو، هيونداي، كيا، تويوتا، مازدا، ميتسوبيشي، هوندا، وبي إم دبليو.. وغيرهم.

ومش بس عربيات.. اليوم التاني فيه تكييفات، أثاث، أجهزة كهربائية، خردة، قطع غيار، بطاريات، كاوتش، وحتى كتب وألوميتال.

لو حابب تدخل المزاد، لازم تشتري كراسة الشروط بـ400 جنيه للجلسة، وتدفع تأمين دخول 50 ألف جنيه.. ولو كسبت المزايدة، بتدفع 30% فورًا والباقي خلال 15 يوم.

بس مهم جدًا المعاينة قبل الشراء شرط أساسي، ودخولك المزاد معناه إنك موافق على حالة العربية أو البضاعة.. لو بتدور على صفقة قوية.. يمكن المزاد ده يكون فرصتك