هل مريض الشلل من مستحقي كارت الخدمات المتكاملة؟.. اعرف التفاصيل وخطوات الاستعلام

كتير من الناس بتسأل.. لو حد مصاب بالشلل، هل من حقه يطلع كارت الخدمات المتكاملة؟ الإجابة باختصار.. أيوه وزارة التضامن الاجتماعي وضحت إن المصابين بالشلل الرباعي أو النصفي، وكمان حالات الشلل الدماغي، من الفئات المستحقة لكارت الخدمات المتكاملة، وده بيخليهم يستفيدوا بمجموعة كبيرة من المزايا.

طيب إيه أهم المميزات؟ أول حاجة.. الدمج في المدارس والمعاهد والجامعات. تاني حاجة.. التعيين بنسبة 5% في الوظائف الحكومية. وكمان إعفاءات جمركية على سيارة مخصصة لذوي الإعاقة. غير كده في تسهيلات في الرعاية الصحية وبعض الخدمات الحكومية. ومش بس حالات الشلل اللي ليها حق التقديم.

في فئات تانية حددتها الوزارة زي:
المصابين بمتلازمة داون.
اللي عندهم أكثر من إعاقة.
الإعاقات الذهنية المزمنة.
فاقدي السمع.
مرضى ضمور العضلات.
الإعاقات الجسدية المختلفة.
وحالات شلل الأطفال.

طيب لو مقدم بالفعل وعايز تعرف البطاقة وصلت لفين؟
الموضوع بسيط جدًا 
بتدخل على موقع وزارة التضامن للاستعلام عن بطاقة الخدمات المتكاملة.
تختار أيقونة الاستعلام.
تكتب الرقم القومي.
وتضغط استعلام.

وهتظهر لك حالة الطلب: يا إما مقبول، أو تحت المراجعة، أو مرفوض مع توضيح السبب. ولو البطاقة جاهزة، بتروح تستلمها من مكتب البريد التابع لمحل سكنك.. المهم إن أي حد عنده حالة إعاقة من الفئات المحددة يعرف حقه كويس، ومايسيبش الدعم يضيع عليه.