بعد صرفها رسميا.. تعمل إيه لو مجتلكش رسالة منحة التموين في رمضان؟

لو معاك بطاقة تموين ومستني تعرف هتنزل لك منحة الـ400 جنيه ولا لأ ركز في الكلام ده للآخر.. وزارة التموين والتجارة الداخلية بدأت رسميًا صرف منحة دعم إضافي بقيمة 400 جنيه شهريًا لكل بطاقة تموينية مستحقة، وده خلال شهري مارس وأبريل، يعني إجمالي 800 جنيه على مدار شهرين كاملين.. والقرار هيستفيد منه حوالي 10 ملايين بطاقة تمثل قرابة 25 مليون مواطن.

طب إزاي تعرف إنك مستحق؟ الموضوع بسيط جدًا لو أنت من المستحقين هيوصلك رسالة نصية قصيرة على موبايلك بتأكد إن ليك منحة، والرسالة دي بتظهر كمان مع بون صرف الخبز، يعني وانت بتصرف عيش هتعرف موقف بطاقتك فورًا من غير ما تقدم أي طلب جديد ولا تلف على مكاتب.

طيب هتصرف الفلوس دي منين؟ الصرف متاح من خلال حوالي 40 ألف منفذ تمويني على مستوى الجمهورية، سواء مجمعات استهلاكية أو منافذ “كاري أون” أو “جمعيتي” أو بدالي التموين، يعني أقرب منفذ ليك غالبًا هتلاقي الخدمة متوفرة فيه.

طب ولو ماوصلتكش رسالة؟ هنا بقى المهم تراجع منفذ التموين التابع ليك أو تتابع بون صرف الخبز، لأن الاستحقاق بيظهر رسميًا على السيستم، ومش معنى إن الرسالة ماجتش إنك مش مستحق، فالأفضل تتأكد بنفسك.

يعني  الدعم نازل فعلًا، والآلية واضحة، واللي ليه حق هياخده من غير تقديم جديد بس خليك متابع رسالتك وبون العيش علشان متفوتش حقك.