قفزة جديدة للدولار.. موعد صرف معاشات مارس.. والدهب يواصل الارتفاع
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، قفزة جديدة للدولار، وموعد صرف معاشات مارس، والدهب يواصل الارتفاع.
والبداية من سوق صرف العملات الأجنبية اللي بيشهد تحركات سريعة النهاردة حيث واصل سعر الدولار الارتفاع مقابل الجنيه في 5 بنوك وفقد الجنيه ما بين 5 قروش و13 قرش في تعاملات اليوم، وده وفقاً للبيانات اللي اتنشرت على المواقع الإلكترونية الرسمية للبنوك.
وخلينا نستعرض أسعار الدولار في 10 بنوك في تعاملات اليوم ففي البنك الأهلي المصري سجل السعر 47.71 جنيه للشراء و47.81 جنيه للبيع بزيادة 13 قرش للشراء والبيع وفي بنك مصر وصل السعر لـ 47.63 جنيه للشراء و47.73 جنيه للبيع بزيادة 9 قروش للشراء والبيع أما بنك القاهرة فسجل 47.66 جنيه للشراء و47.76 جنيه للبيع بزيادة 6 قروش للشراء والبيع وفي البنك التجاري الدولي سجل 47.65 جنيه للشراء و47.75 جنيه للبيع بزيادة 5 قروش للشراء والبيع وبنك الإسكندرية سجل 47.65 جنيه للشراء و47.75 جنيه للبيع بزيادة 11 قرش للشراء والبيع.
ونروح لخبر يهم قطاع عريض جداً من المصريين وهو إن الهيئة القومية للتأمين الاجتماعي هتبدأ صرف معاشات شهر مارس من يوم الأحد الموافق الأول من مارس وهيتم الصرف من خلال ماكينات الصراف الآلي الآي تي إم الخاصة بالبنوك والبريد المصري المنتشرة في كل الجمهورية أو من خلال المحافظ الإلكترونية وكمان ارتفع الحد الأدنى لأجر الاشتراك التأميني من 2300 جنيه لـ 2700 جنيه والحد الأقصى زاد من 14500 جنيه لـ 16700 جنيه وده من أول يناير اللي فات حسب تصريحات اللواء جمال عوض رئيس الهيئة القومية للتأمين الاجتماعي.
والهدف من التعديل ده هو ربط الأجور الفعلية للمؤمن عليهم بمستحقاتهم التأمينية في المستقبل وده بيساهم في تحسين مستوى المعاشات وأضاف عوض في بيان رسمي إن الحد الأدنى للمعاش للناس اللي هتطلع تقاعد من أول يناير 2026 هيزيد ويوصل لـ 1755 جنيه بدلاً من 1495 جنيه وكمان الحد الأقصى للمعاش هيوصل لـ 13360 جنيه مقارنة بـ 11600 جنيه حاليا.
ومن المعاشات لسوق الصاغة اللي فيه أسعار الذهب زادت النهاردة في مصر بحوالي 10 جنيهات، حسب كلام نادي نجيب سكرتير عام شعبة الذهب سابقاً وبكده سعر الذهب عيار 14 وصل لـ 4613 جنيه للجرام وعيار 18 زاد لـ 5931 جنيه للجرام وصعد عيار 21 لـ 6920 جنيه للجرام أما عيار 24 فاستقر عند 7908 جنيه للجرام والجنيه الذهب ارتفع لـ 55360 جنيه وطبعاً السعر ده ممكن يختلف من تاجر لتاجر وهو بيساوي قيمة الذهب اللي في الجنيه.
ونختم جولتنا من عند ستيفان جيمبرت المدير الإقليمي للبنك الدولي اللي جدد التزام البنك بتقديم كل أنواع الدعم الفني والخبرات المطلوبة للحكومة المصرية في مجالات حيوية كتير زي الحوكمة المالية ودعم مراجعات الإنفاق العام وتوفير الموارد المحلية عشان نضمن إطار مالي قوي على المدى المتوسط وأوضح إن التعاون مستمر عشان يشمل قطاعات الحماية الاجتماعية والصحة من خلال تقديم تحليلات متقدمة لدعم منظومة التأمين الصحي الشامل وتعزيز المرونة الاقتصادية بمساندة إدارة التجمعات الاقتصادية اللي بتساعد في توفير فرص عمل أكتر وجاء الكلام ده خلال استقبال الدكتور أحمد رستم وزير التخطيط والتنمية الاقتصادية لبعثة رفيعة المستوى من البنك الدولي وفريق عمل البنك بالقاهرة بحضور الدكتورة سمر الأهدل نائبة وزير الخارجية والتعاون الدولي والمصريين بالخارج.
