قفزة جديدة للدهب.. استقرار في سعر الدولار.. وعودة الهدوء لأسعار الفراخ
رصدت بانكير، عدد من الأحداث المحلية والعالمية، عبر منصاتها المختلفة خلال الساعات الأخيرة، ولذلك سوف نستعرض معكم أبرز الأخبار ضمن الجولة العالمية الجديدة في أسواق المال والشركات والطاقة حول العالم، تأتيكم من بانكير.
والبداية من سوق الصاغة.. اللي بيشهد ارتفاع في أسعار الذهب خلال تعاملات النهاردة، وده بسبب زيادة السعر في البورصات العالمية، وسط حالة ترقب كبيرة في الأسواق وتحركات المستثمرين مع التغيرات اللي بتحصل في الاقتصاد العالمي.
سعر جرام الذهب عيار 24 وصل لحوالي 7914 جنيه، ولسه هو العيار الأعلى من حيث الجودة والنقاء، وعشان كدة هو المفضل عند فئة من المستثمرين اللي بيدوروا على الذهب الخام، رغم إن الإقبال عليه محدود شوية بسبب سعره العالي مقارنة بالأعيرة التانية.
أما عيار 21 فسجل حوالي 6925 جنيه، ومحافظ على مكانته كأكتر عيار بيتباع ويشترى في السوق المصري، وهو المرجع الأساسي لحركة الأسعار، خصوصاً وإنه مرتبط بعادات الادخار وجهاز العرايس، وده مخلّي الطلب عليه مستقر نسبياً.
وبالنسبة لجرام الذهب عيار 18 فسجل حوالي 5935 جنيه، ومستفيد من إقبال الشباب عليه بسبب سعره الأقل وتصميماته المودرن اللي بتخليه اختيار عملي للي عاوز يشتري مشغولات شكلها جديد بسعر معقول.
ووصل سعر جرام الذهب عيار 14 لحوالي 4616 جنيه، ومستمر في جذب الناس اللي بتدور على حلول اقتصادية لشراء الذهب، سواء عشان يشيلوا قرشين لليوم الأسود أو يقدموا هدايا، مع الحفاظ على قيمة المعدن.
أما الجنيه الذهب فسجل حوالي 55400 جنيه، ولسه من أكتر الحاجات اللي بتتباع في الهدايا والمناسبات، عشان سهل في بيعه وشراه وقيمته مستقرة.
ومن الصاغة نروح لسوق العملة.. وسعر الدولار الأمريكي مستقر قدام الجنيه المصري النهاردة، ووصل سعره في البنك الأهلي المصري لمستوى 47.54 جنيه للشراء و 47.64 جنيه للبيع.
أما في البنوك الخاصة والأجنبية، فالدولار معروض كالتالي:
في البنك التجاري الدولي (CIB) سجل 47.55 جنيه للشراء و 47.65 جنيه للبيع.
وفي بنك قناة السويس الدولار بحوالي 46.99 جنيه للشراء و 47.09 جنيه للبيع.
أما في بنك البركة و بنك فيصل الإسلامي فسجل 47.50 جنيه للشراء و 47.60 جنيه للبيع.
وفي شركات الصرافة، وصل السعر لمستوى 47.54 جنيه للشراء و 47.64 جنيه للبيع.
ونروح لأسعار الفراخ.. والأسعار مستقرة في بورصة الدواجن النهاردة، اللحم الأبيض سجل 91 جنيه للكيلو، بسعر تنفيذ فعلي 90 جنيه، واللحم الساسو تراوح ما بين 105 و106 جنيه للكيلو.
وعن حالة البورصة النهاردة، حازم المنوفي، عضو شعبة المواد الغذائية، قال إن انخفاض الأسعار مع بداية شهر رمضان راجع لبدء "الصوم الكبير" عند الإخوة المسيحيين، وده بيخلي الإقبال يقل على الفراخ واللحمة، فبالتالي السعر بينزل.
وأسعار الفراخ البيضاء للمستهلك مستقرة، والسعر بيزيد عن البورصة بحوالي 10% عشان مصاريف النقل، والأسعار في المحلات كانت كالتالي:
فراخ بيضاء: 108 جنيه
فراخ بلدي: 130 جنيه
بط أبيض: 110 جنيه
أوراك: 112 جنيه
أجنحة صافي: 70 جنيه
كبدة صافي: 140 جنيه
كبدة وقوانص: 120 جنيه
دبوس: 130 جنيه
شيش طاووق: 220 جنيه
بانيه: 240 جنيه
ونختم من وزارة الكهرباء.. وفي إطار المتابعة والجولات الميدانية، قام الدكتور محمود عصمت، وزير الكهرباء، بزيارة لمحطة الربط المصري السعودي بمدينة بدر، وتفقد المحطة اللي بتعتبر الأولى من نوعها في الشرق الأوسط من حيث الحجم والتكنولوجيا والتشغيل، وتابع بنفسه إنهاء كل الأعمال ومرحلة الاختبارات عشان المشروع يشتغل خلال الأسابيع اللي جاية.
الوزير تفقد أقسام المحطة ومركز التحكم وتابع اختبارات المعدات عشان يبدأ الربط الفعلي بين شبكة مصر والسعودية، وده ضمن رؤية الدولة لتوفير حلول مستدامة تضمن استقرار الكهرباء وتحسن جودة الخدمة.
