بعد زيادة 300 جنيه.. اعرف إزاي تقدم في معاش الطفل
الأربعاء 18/فبراير/2026 - 11:02 م
لو عندك طفل مستحق للدعم.. الخبر ده يهمك جدا.. الدولة زودت معاش الطفل 300 جنيه زيادة استثنائية قبل رمضان والعيد.
طيب يعني إيه معاش الطفل؟ ده دعم نقدي شهري للأطفال اللي معندهمش عائل أو عايشين في ظروف صعبة، وبيتصرف لحد سن 18 سنة.
طيب مين يستحق؟ الأيتام، مجهولي الأب، أبناء الأم المطلقة في حالات معينة، أو لو العائل مسجون وكمان أي طفل مفيش حد قادر يصرف عليه.
غير المعاش الشهري، في منحة تعليمية كمان بتوصل لـ 200 جنيه في الشهر خلال السنة الدراسية.
طب أقدم إزاي؟ .. بسيطة تروح وحدة الشؤون الاجتماعية في منطقتك، تملى استمارة الطلب، وتقدم الأوراق المطلوبة.. بعدها بيتم بحث اجتماعي، ولو الحالة مستحقة بيبدأ الصرف رسميًا.
الأوراق المطلوبة:
بطاقة الرقم القومي، شهادات ميلاد الأطفال، مستند يثبت الحالة الاجتماعية، شهادة قيد دراسي، وإقرار بعدم وجود دخل ثابت.
