زلزال في سوق الصاغة.. سر الهبوط المفاجىء للدهب
الدهب في الايام الاخيرة مش ثابت على حال يوم فوق ويوم تحت فيا ترى إيه اللي بيحصل في سوق الذهب وليه الأسعار اللي كانت طايرة في السما بدأت تنزل فجأة وبقوة وإيه السر وراء حالة التذبذب الغريبة اللي بتخلي الجرام يزيد الصبح وينزل بليل وهل فعلا الدولار في أمريكا هو اللي بيتحكم في مصير مدخراتك هنا في مصر.
في الكام يوم اللي فاتوا إحنا قدام مشهد جديد ومثير جدا في أسواق الصاغة محليا وعالميا بعد ما شهدت الأسعار تراجع كبير ومفاجئ خلال تعاملات يوم الاثنين وده اللي خلى كل اللي معاه ذهب أو بيفكر يشتري يسأل عن سر الهبوط ده وتأثيره على المحفظة بتاعته في الفترة اللي جاية وتقارير صادرة عن منصة آي صاغة أكدت إن المعدن الأصفر فقد كتير من بريقه بسبب صعود الدولار وتراجع احتمالات خفض أسعار الفائدة من جانب مجلس الاحتياطي الفيدرالي الأمريكي وده اللي رمى بظلاله فورا على السوق المصري اللي بيتأثر بكل حركة بتحصل في البورصات العالمية لحظة بلحظة
الأرقام هنا هي اللي بتحكي القصة الكاملة للانهيار الأخير في الأسعار حيث كشف سعيد إمبابي المدير التنفيذي لمنصة آي صاغة إن سعر جرام الذهب عيار 21 فقد نحو 60 جنيها دفعة واحدة ليهبط لمستوى 6640 جنيها بعد ما كان مسجل مستويات قياسية الأيام اللي فاتت وده بالتزامن مع تراجع الأونصة في الأسواق العالمية بنحو 47 دولارا لتسجل 4996 دولارا والنزول ده مكنش في عيار واحد بس لكنه شمل كل الأعيرة حيث سجل جرام الذهب عيار 24 حوالي 7589 جنيها وسجل عيار 18 نحو 5691 جنيها بينما بلغ سعر الجنيه الذهب قرابة 53120 جنيها وده بيعكس حالة من التصحيح السعري العنيف اللي سيطرت على السوق مع بداية تعاملات الأسبوع الحالي.
السبب الحقيقي وراء التذبذب ده بيرجع للحرب الباردة بين الذهب والدولار في السوق العالمي حيث تحرك المعدن الأصفر بالقرب من مستوى 5000 دولار للأونصة بعد موجة صعود قوية كانت مدفوعة ببيانات تضخم أمريكية ضعيفة لكن بداية الأسبوع شهدت حالة من الحذر والتردد بين المستثمرين اللي خافوا يدفعوا الأسعار لمستويات أعلى من كدة خاصة بعد ما ظهرت بيانات سوق العمل الأمريكية بقوة غير متوقعة مع إضافة 130000 وظيفة وتراجع معدل البطالة لـ 4.3% والبيانات دي خلت الدولار يرفع راسه تاني ويقلل من جاذبية الذهب كملاد آمن لأن قوة الاقتصاد الأمريكي معناها إن الفيدرالي مش هيكون مستعجل أوي في خفض الفائدة زي ما الناس كانت متخيلة وده هو اللغز اللي بيخلي الذهب طالع نازل كل شوية بناء على أي تصريح أو بيان بيخرج من واشنطن.
وعشان نفهم إيه اللي جاي لازم نبص على تسعير العقود الآجلة اللي بتقول إن أول خفض للفائدة الأمريكية ممكن يبدأ في شهر يونيو اللي جاي والتوقعات دي هي اللي بتحرك السوق حاليا مابين تفاؤل بخفض الفائدة اللي هيرفع الذهب لمستويات جنونية وما بين بيانات اقتصادية بتقول إن لسه بدري على الكلام ده وده اللي بيخلق حالة التذبذب اللي بنشوفها في مصر النهاردة والواقع بيقول إن الذهب بيفضل هو الميزان الحساس اللي بيتأثر بكل خبر اقتصادي سواء عن التضخم أو الوظائف أو حتى السياسة النقدية العالمية والوضع الحالي بيفرض على الكل حالة من الترقب لأن الهبوط اللي حصل النهاردة ممكن يكون مجرد استراحة محارب قبل موجة جديدة أو بداية لمرحلة من الاستقرار السعري اللي المستهلكين والمستثمرين مستنيينها بفارغ الصبر عشان يحددوا بوصلة استثماراتهم في المعدن النفيس اللي بيفضل دايما هو مخزن القيمة الأول رغم كل العواصف والتقلبات اللي بيمر بيها السوق.
