بأقل من 700 ألف.. أرخص عربية كوري تشتريها دلوقتي
لو بتدور على أرخص عربية زيرو بسعر على القد، الخبر ده ليك.. شركة منصور، وكيل علامة شيفروليه في مصر، طرحت شيفروليه أوبترا موديل 2026 كأقل طراز في فئتها حاليًا، بسعر بيبدأ من 699 ألف و900 جنيه للفئة الأولى، و724 ألف و900 جنيه للفئة التانية.
العربية بتيجي بمحرك 1500 سي سي، 4 سلندر، بقوة 98 حصان، مع فتيس أوتوماتيك CVT بيوفر في استهلاك البنزين وسلاسة في السواقة، خصوصًا داخل المدينة.
من جوه هتلاقي شاشة لمس 8 بوصة بتدعم Apple CarPlay وAndroid Auto، عجلة قيادة متعددة الوظائف، وفرش قماشي عملي.
ومن ناحية الأمان، فيها وسائد هوائية أمامية، ABS، EBD، نظام ثبات إلكتروني ESC، حساسات ركن خلفية وكاميرا، وكمان نظام مراقبة ضغط الإطارات.
مساحة الشنطة بتوصل لـ 475 لتر وبتكبر لحد 910 لتر مع طي المقاعد، وده يخليها مناسبة للعيلة والسفر.
يعني لو ميزانيتك حوالين 700 ألف جنيه وعايز عربية سيدان عائلية مجمعة محليًا وبإمكانيات معقولة، أوبترا 2026 داخلة تنافس بقوة في الفئة دي.
