لو بطاقة التموين ضاعت.. اعمل الخطوات دي من البيت

بطاقة التموين بتاعك ضاعت ومش عارف تصرف التموين ولا العيش المدعم.. استنى… قبل ما تقول التموين راح عليا، الحل أسهل مما تتخيل.

لو بطاقة التموين ضاعت ومش عارف تتصرف إزاي، متقلقش، الخطوات واضحة من وزارة التموين وهتخلص الموضوع بسرعة.

أول خطوة ومهمة جدًا، توقف البطاقة فورًا يا إما تتصل على 19765، أو تروح أقرب مكتب تموين ليك عشان تمنع أي استخدام غلط للبطاقة.

تاني خطوة ، تقدم طلب استخراج بدل فاقد أو تالف.

تقدر تعمل ده بطريقتين: تروح مكتب التموين وتقدم الطلب هناك، أو تقدم أونلاين من خلال بوابة مصر الرقمية وانت في بيتك.

تالت خطوة: تتأكد إن بياناتك مظبوطة عشان البطاقة القديمة تتلغي والجديدة تطلع من غير مشاكل.

رابع خطوة: تستلم البطاقة الجديدة وتفعلها بالرقم السري من مركز الخدمة، وبكده ترجع تصرف التموين تاني عادي.

خليك عارف أن  الدعم بيرجعلك من الشهر اللي بعد إصدار البطاقة الجديدة، يعني كل ما تتحرك أسرع، هتوفر على نفسك وقت ودعم.