من الفأس للأقمار الصناعية.. تطبيق "نباتك" بيغير شكل الزراعة في مصر
الفلاح المصري زمان كان معروف بالفأس والتعب والطوابير، النهارده الصورة اختلفت تمامًا.. الفلاح بقى معاه موبايل، وكارت ذكي، وتطبيق بيقوله يزرع إمتى، ويسقي إمتى، ويعالج المحصول إزاي.
وزارة الزراعة أطلقت تطبيق "نباتك" كجزء من خطة التحول الرقمي، واللي بيعتبر ثورة حقيقية في خدمة الفلاح المصري. التطبيق بيقدم إرشاد زراعي ذكي مبني على أحدث الأبحاث، وبيستخدم الذكاء الاصطناعي وصور الأقمار الصناعية علشان يتابع حالة المحصول ويحدد احتياجاته بدقة.
من خلال صورة واحدة بس للنبات، التطبيق يقدر يشخص الأمراض والآفات، ويحدد مواعيد الري والتسميد الصح، وكمان يتنبأ بالتقلبات المناخية قبل ما تحصل، وده بيقلل الخسائر وبيزوّد الإنتاجية.
مش بس كده، "نباتك" بيربط الفلاح بالأسواق المختلفة، وبيساعده في التسويق والدعم اللوجستي، وكمان مرتبط بالبنك الزراعي لتسهيل الدعم المالي.. يعني ببساطة.. الزراعة في مصر دخلت عصر جديد، والفلاح بقى معاه دليل زراعي كامل في جيبه.
