لو رفضت تدفع الإيجار القديم بعد الزيادة.. هيحصل ايه؟

ناس كتير بتسأل إيه الموقف القانوني لو المستأجر رفض دفع أجرة الإيجار القديم بعد الزيادة المقررة

وطبقا للقوانين السارية لحد يناير 2026، عدم سداد الزيادة القانونية بيتحسب امتناع عن سداد الأجرة كاملة.

أول خطوة بيعملها المالك إنه يبعت إنذار رسمي على يد محضر، يطالب فيه بسداد الأجرة المتأخرة مضاف ليها الزيادة القانونية، وده خلال 15 يوم من تاريخ استلام الإنذار.

لو المدة عدت من غير سداد، من حق المالك يرفع دعوى طرد لعدم سداد الأجرة قدام المحكمة المختصة، وده إجراء قانوني مباشر.

القانون رقم 136 لسنة 1981، وتحديدا المادة 18، بيدي المالك الحق يطلب إخلاء الوحدة لو الأجرة المستحقة ما اتسددتش، وده معناه إن العقد ممكن يتم فسخه قانونا.

لكن القانون كمان بيدي فرصة أخيرة للمستأجر، وده بيكون عن طريق سداد الأجرة المتأخرة والزيادة القانونية وكمان المصاريف القضائية، بشرط إن ده يحصل قبل قفل باب المرافعة في الدعوى.

النقطة المهمة إن لو التأخير اتكرر مرة تانية بعد كده، المالك من حقه يرفع دعوى طرد للتكرار، وساعتها الطرد بيتم مباشرة من غير إنذار جديد.

يعني رفض سداد الزيادة القانونية في الإيجار القديم مش موضوع بسيط، وبيعرض المستأجر لخطر الطرد وفقدان الوحدة.