لو عقد الإيجار القديم ضاع.. ياترى إزاي تقدم على شقة بديلة
ناس كتير عقد الإيجار القديم ضاع منها.. عشان كده بتسأل أزاي أقدم على وحدة بديلة من غير العقد.
والإجابة موجودة في إخطار رسمي بيطلع من لجنة الفحص بالقيمة الإيجارية للوحدة.
لجنة الفحص دلوقتي شغالة على تقييم الوحدات وبتحدد القيمة الإيجارية القديمة المسجلة لكل وحدة.
وبعد المراجعة بتصدر إخطار رسمي من الجهة المختصة في المحافظة أو الحي.
الإخطار ده بيكون فيه بيانات أساسية بتعوض غياب العقد، زي القيمة الإيجارية القديمة للوحدة، وبيانات المستأجر والمالك، وتاريخ بداية العلاقة الإيجارية، وكمان القرار النهائي للجنة بعد فحص المستندات المتاحة.
أهمية الإخطار بتظهر لأنه بيستخدم في استكمال ملف التقديم على الوحدة البديلة، وبيثبت العلاقة الإيجارية الفعلية في حالة ضياع العقد أو عدم وضوحه، وبيحدد الفترة القانونية للإقامة داخل الوحدة.
الإخطار ممكن يوصلك بالبريد المسجل، أو عن طريق الحي التابع ليه العقار، وفي بعض الحالات تقدر تستلمه بنفسك بعد مراجعة لجنة الفحص.
يعني لو عقد الإيجار القديم مش موجود، إخطار لجنة الفحص هو الورقة اللي بتكمل الملف وبتفتحلك باب التقديم على الوحدة البديلة.
