لو عايز تضيف أولادك على التموين.. تعمل إيه؟
الأربعاء 21/يناير/2026 - 07:00 م
لسه رايح مكتب التموين استنى قبل ما تنزل، في 2026 تقدر تضم مراتك وأولادك على بطاقة التموين وأنت في البيت ومن غير طوابير ولا وجع دماغ
وده لأن وزارة التموين فعلت خدمة جديدة على منصة مصر الرقمية تقدر من خلالها تضيف أفراد أسرتك على البطاقة التموينية بخطوات سهلة جدًا وكلها أونلاين.
كل اللي عليك تعمله إنك تدخل على منصة مصر الرقمية وتختار خدمات التموين وبعدها تضغط على خدمة ضم أفراد أسرتي وتقرا الشروط كويس وتدخل البيانات صح وتقدم الطلب في دقايق.
بس خد بالك من الشروط لازم اللي يقدم الطلب يكون صاحب البطاقة ورب الأسرة والشخص اللي هتضيفه مايكونش مضاف على بطاقة تانية ومايكونش من الفئات المستبعدة من الدعم وكمان ممنوع إضافة أسماء متوفين أو ناس مش ساكنة معاك في نفس العنوان
ودلوقتي قولنا جربت تضيف عيلتك على البطاقة اونلاين؟
