أقل من 24 ساعة.. تخصيص 400 ألف شقة رسميا
لو أنت من الناس اللي قدمت على طرح الـ400 ألف وحدة وسددت جدية الحجز.. اللحظة اللي مستنيها بقالك شهور بدأت رسميا.
وزارة الإسكان أعلنت إن تخصيص وحدات المرحلة التانية هيبدأ من الساعة 10 صباح اليوم الأحد 11 يناير 2026.. والتخصيص هيكون إلكتروني بالكامل من خلال منصة مصر العقارية، وبأسبقية الحجز من غير تدخل بشري.
الوزارة أوضحت إن كل مواطن سجل رغباته وسدد جدية الحجز يقدر يدخل على المنصة في الموعد المحدد ويتابع إجراءات التخصيص حسب نوع المشروع اللي اختاره.
الجدول الزمني واضح ومقسم على أيام علشان الزحمة، يومي 11 و12 يناير لتخصيص وحدات ديارنا، ويومي 13 و14 يناير لتخصيص وحدات ظلال، ويومي 18 و19 يناير لتخصيص وحدات جنة وسكن مصر والإسكان الحر وروضة العبور.. ويومي 20 و21 يناير لتخصيص وحدات الإسماعيلية.
المهم إن التخصيص هيتم بأسبقية الدخول والحجز الإلكتروني، يعني السرعة والدقة عاملين فرق، وكل اللي عليك تتابع في يومك المحدد وتتأكد إن بياناتك كاملة على المنصة.
دي خطوة تنفيذية جديدة في أكبر طرح سكني، وبتأكد إن الموضوع دخل مرحلة الجدية والتسليم واحدة واحدة.
