قطار "قطاع الأعمال" يسرع الخطى.. 126 مليار جنيه إيرادات بنمو 20% في 2025
اللي حصل في شركات قطاع الأعمال العام السنة اللي فاتت مش رقم عادي ولا خبر يعدي وخلاص.
إحنا بنتكلم عن قفزة حقيقية، ونتايج ملموسة على الأرض، وأرقام بتقول إن في تغيير فعلي بيحصل.
سنة 2025 كانت علامة فارقة، قطاعات كانت متوقفة رجعت تشتغل، وشركات خسرانة بقالها سنين بقت رابحة، وصادرات بتزيد، واستثمارات بتتحرك بسرعة غير مسبوقة.
خلال العام المالي 2024–2025، شركات قطاع الأعمال العام حققت إيرادات وصلت لحوالي 126 مليار جنيه، بنسبة نمو تقرب من 20% مقارنة بالسنة اللي قبلها.
الرقم ده مش بس كبير، ده بيعكس شغل ضخم اتعمل على مستوى التطوير والتشغيل والإدارة.
كمان صافي الربح المجمع وصل لـ24 مليار جنيه، وده معناه إن الشركات مش بس بتدخل فلوس، لكن كمان بتشتغل بكفاءة أعلى، وبتقلل الهدر والخسائر اللي كانت مزمنة عند بعض الكيانات.
والصادرات كان ليها نصيب كبير من الطفرة دي، وارتفعت بنسبة 27% لتوصل لحوالي مليار دولار، وده بيوضح إن منتجات شركات قطاع الأعمال بقت قادرة تنافس بره، مش جوه بس.
ولو بصينا على البورصة، هنلاقي إن القيمة السوقية للشركات التابعة المدرجة زادت حوالي 36%، وده مؤشر ثقة واضح في الأداء، وكمان تحول شركات تقيلة للربحية بعد سنين طويلة من الخسارة، زي: شركة النصر للسيارات لأول مرة من عقود، وسيد للصناعات الكيماوية، والنصر العامة للمقاولات.
وخلينس اقولك ان احدة من أهم قصص النجاح كانت إحياء الأصول الصناعية المتوقفة، وعلى رأسها شركة النصر للسيارات، اللي رجعت للإنتاج في الربع الأخير من 2024 بعد توقف أكتر من 15 سنة.
الشركة بدأت بإنتاج أتوبيسات "نصر سكاي" السياحية بمواصفات عالمية، ورفعت نسبة المكون المحلي من 52% لـ63.5% في سنة واحدة، ووقعت عقود لتوريد 250 أتوبيس لشركات نقل وسياحة، غير توريدات تانية لجهات مختلفة.
مش بس كده، ده تم إطلاق ميني باص "نصر ستار" بنسبة مكون محلي تجاوزت 70%، وتسليم أول دفعة للعمل في مدينة العلمين الجديدة، مع التحضير لإنتاج أتوبيسات وميني باصات كهرباء.
وفي نفس الوقت، تم الانتهاء من تطوير شامل لمصنع سيارات الركوب الملاكي، وتجهيزه بأحدث خطوط التجميع واللحام والدهان، مع تجارب تشغيل فعلية على نماذج سيارات مختلفة.
وكل اللي بيحصل ده مش عشوائي، لكنه جزء من خطة واضحة مرتبطة بـرؤية مصر 2030، وهدفها تحسين كفاءة الشركات، وتعظيم العائد على استثمارات الدولة، مع تطبيق الحوكمة والاستدامة والسلامة المهنية.
يعني قطاع الأعمال العام دخل مرحلة جديدة.. مرحلة أرقام حقيقية، وتشغيل فعلي، وشركات بترجع للحياة من تاني.
