عائد ثابت وجوائز دهب.. شهادة الذهب من cib أفضل وعاء ادخاري في 2026
في وقت الناس كلها بتدور فيه على ادخار يطمنها ويدخل لها دخل ثابت من غير مغامرة كبيرة ومع ارتفاع الاهتمام بالدهب كملاذ آمن.
ظهر منتج مصرفي جديد بيحاول يجمع بين الاستقرار والتحفيز النفسي وبين العائد المنتظم وفرصة المكسب الكبير.
منتج بيخاطب عقل المدخر وقلبه في نفس الوقت وبيقدم فكرة مختلفة عن الشهادات التقليدية اللي اتعودنا عليها.
البنك التجاري الدولي سي اي بي أعلن عن طرح شهادة ادخار جديدة باسم شهادة الذهب ودي شهادة معمولة بشكل مختلف عن الشهادات المعتادة لانها مش بس بتدي عائد ثابت لكنها كمان بتدي فرص شهرية للفوز بجوايز دهبية.
وده في وقت السوق المصرفي فيه منافسة قوية على السيولة والبنوك بقت محتاجة تقدم افكار جديدة تشجع الناس تحط فلوسها وتربطها لفترات أطول.
شهادة الذهب الجديدة بتيجي بعائد ثابت سنوي يصرف بشكل شهري بنسبة 5 في المية.
وده عنصر مهم جدا لناس كتير بتدور على دخل دوري ثابت يساعدها في مصاريفها الشهرية من غير ما تمس اصل المبلغ.
وفي نفس الوقت الشهادة بتدي فرص شهرية للفوز بجوايز دهب وده عامل جذب نفسي كبير خصوصا في ظل ثقة شريحة واسعة من المصريين في الدهب كقيمة مستقرة على المدى الطويل.
الدكتور خالد الشافعي الخبير الاقتصادي وصف الشهادة دي انها من المنتجات المصرفية الذكية لانها بتخاطب مدخرين عايزين استقرار وعائد منتظم.
وفي نفس الوقت مش حابين يفوتوا فرصة المكسب الاضافي المرتبط بالجوايز وده بيخلق توازن واضح بين الادخار الآمن والتحفيز النفسي.
وخصوصا ان في عملاء كتير بيفضلوا الادوات اللي بتديهم دخل شهري ثابت بدل ما يستنوا العائد في نهاية المدة.
مدة شهادة الذهب 3 سنين ودي مدة مناسبة لناس كتير سواء مدخرين على المدى المتوسط او الطويل.
وميزة كمان ان البنك أعلن ان ربط الشهادة هيبدأ من 1 يناير 2026 وده بيدي فرصة للناس ترتب اوضاعها المالية وتشوف هتربط بمبلغ قد ايه وتخطط التزاماتها بشكل مريح.
الحد الادنى لشراء شهادة الذهب 20 الف جنيه ومن غير حد اقصى ودي نقطة مهمة لانها بتفتح الباب قدام شرايح مختلفة من المجتمع سواء ناس بمدخرات محدودة او ناس عندها مبالغ اكبر وحابة تستثمرها في وعاء ادخاري آمن مع فرصة مكسب اضافي
عنصر الجذب الاكبر في الشهادة هو سحوبات الدهب الشهرية الجوايز مش رمزية.
لان الجايزة الكبرى عبارة عن سبيكة دهب وزن 1 كيلوجرام عيار 24 بالاضافة الى توزيع 50 جنيه دهب عيار 21 كل شهر وده بيخلي الشهادة ليها طابع استثماري واضح خصوصا مع زيادة الاقبال على الدهب في الفترات اللي فيها تقلبات اقتصادية.
الميزة كمان ان فرص الفوز بتزيد مع زيادة قيمة الشهادة يعني العميل اللي يربط 20 الف جنيه بياخد فرصتين في السحب ومع كل 10 الاف جنيه زيادة بياخد فرصة اضافية وده بيشجع ناس كتير تزود قيمة الربط بدل ما تكتفي بالحد الادنى.
السحوبات الشهرية بتتم تحت اشراف وزارة التضامن الاجتماعي وده عنصر مهم جدا في تعزيز الثقة والشفافية.
وخصوصا ان عدد الفائزين كل شهر 51 فايز ولمدة 36 شهر يعني فرص الفوز متكررة وعلى مدار عمر الشهادة كله.
ومن النقاط القوية جدا في شهادة الذهب ان البنك بيدي تسهيلات ائتمانية بضمان الشهادة بنسبة توصل ل 95 في المية وده معناه ان العميل لو احتاج سيولة في اي وقت يقدر ياخد تمويل بضمان الشهادة من غير ما يكسرها.
ومن غير ما يخسر العائد الشهري ولا فرص الدخول في السحوبات.
بشكل عام شهادة الذهب من البنك التجاري الدولي بتقدم نموذج مختلف لفكرة الادخار التقليدي نموذج بيجمع بين عائد ثابت ودخل شهري منتظم وفرص حقيقية للفوز بجوايز دهب كبيرة ومرونة في الربط والتمويل وشفافية في السحوبات.
وده بيخليها خيار مناسب لشريحة واسعة من المدخرين اللي بيدوروا على الامان ومعاه فرصة مكسب اضافي من غير مخاطرة.
