ما تشحنش قبل ما تعرف.. ليه كارت الكهرباء بيتخصم منه أكتر من 300 جنيه؟
الإثنين 15/ديسمبر/2025 - 12:20 ص
عمرك شحنت كارت الكهرباء بـ400 جنيه، ودخلت الرقم تلاقي الرصيد بقى 22 بس؟
متستغربش.. الموضوع ليه أسباب كتير
أول سبب، وده الأشهر.. لو عدادك راكب بالتقسيط، الشركة بتخصم كل شهر جزء من تمن العداد، يعني القسط بيتسحب أوتوماتيك أول ما تشحن.
السبب التاني
ممكن يكون عندك متأخرات قديمة لسه ما اتخصمتش، فأول ما تشحن الكارت المديونية بتتخصم علطول.
كمان في حاجة اسمها فرق الشرائح، يعني لو استهلاكك زاد، العداد بيحسب بالسعر الأعلى، وبيسحب الفرق من الشحن الجديد.
وطبعًا، في خصم ثابت كل شهر: 9 جنيه حتى لو البيت مقفول والعداد قراءته صفر!
يعني باختصار العداد ما بينامش
فاللي يشحن كارت الكهربا ويتصدم من الرصيد، قبل ما تزعل، شوف إيه اللي اتخصم وليه.
الخصم ممكن يوصل لـ378 جنيه من غير ما تحس.. خليك دايمًا متابع استهلاكك، عشان مفيش شحن بيروح هدر!
