رخصت 30%.. انخفاضات قوية في سوق العربيات
الجمعة 12/ديسمبر/2025 - 07:28 م
لو كنت ناوي تشتري عربية دلوقتي، يبقى الخبر ده مهم جدًا ليك، سوق العربيات في مصر دلوقتي بيشهد تخفيضات قوية، بنسبة بتوصل من 25% لـ30%، والأسعار بقت منافسة جدًا.
وده حسب كلام منتصر زيتون، عضو شعبة السيارات باتحاد الغرف التجارية، اللي قال إن أسباب الانخفاض كتيرة، منها استقرار سعر الصرف، وتيسيرات الاستيراد، وكمان افتتاح 8 خطوط إنتاج محلية جديدة من بداية السنة اللي زادت المعروض في السوق.
وكمان دخول وكلاء جدد خلق حالة منافسة شديدة، وكل وكيل بيحاول يحافظ على حصته في السوق فبقى لازم يخفض الأسعار.
بس في سوق السيارات المستعملة، الوضع ما اختلفش كتير، فالتجار اضطروا يخفضوا الأسعار بعد ما السوق فرض عليهم ده، وبعض السيارات وصل انخفاضها لـ150 لغاية 200 ألف جنيه
يعني سواء جديد أو مستعمل، الوقت دلوقتي مناسب جدًا للشراء.
