شقق بديلة للإيجار القديم.. تعمل إيه عشان تستلم شقة جديدة؟
لو انت ساكن إيجار قديم وعايز تقدم على وحدة بديلة فالموضوع ليه خطوات واضحة والدولة حددتها عشان تنظم العملية ده.
اول خطوة انك بتقدم الطلب يا اما اونلاين من المنصة الموحدة او من بوابة مصر الرقمية يا اما ورقي من مكاتب البريد.
وبتختار خدمة السكن البديل وبتكتب بياناتك كاملة.. وبيانات الشقة القديمة وبتحدد نظام التخصيص اللي يناسبك سواء ايجار مدعوم او تمليك او تمويل عقاري.
وكمان بتحدد المحافظة اللي عايز تستلم فيها ولازم تكون نفس المحافظة اللي فيها الشقة القديمة.
تاني خطوة بتجهز كل المستندات المطلوبة زي عقد الإيجار وصور البطاقات وشهادات الميلاد ومؤشرات الدخل والاهم الإقرار الموثق في الشهر العقاري إنك هتسلم الشقة القديمة اول ما تستلم الجديدة.
ولو الوحدة نشاط تجاري هتقدم سجل وبطاقة ضريبية.. بعد كده بتتابع الطلب اونلاين لحد ما يتم فحصه ولو الشروط متوافرة بيتم المفاضلة بين الناس حسب السن والحالة الاجتماعية وهل انت المستأجر الأصلي ولا من امتد ليه العقد.
لو اتقبلت بتاخد قرار التخصيص وبعدين بتخلي الشقة القديمة رسمي وبتستلم الوحدة الجديدة حسب النظام اللي انت اخترته.
اما الشروط الأساسية.. فلازم تكون مقيم فعلي في الشقة ومش قافلها سنة من غير سبب.
ومايكونش عندك شقة تانية في نفس الغرض.. ولازم الوحدة اللي هتستلمها تكون في نفس المحافظة وبنفس الاستخدام.
