زيادة الإيجار القديم تبدأ رسميا.. اعرف هتدفع كام في ديسمبر

ابتداءً من أول ديسمبر.. الزيادة الجديدة في الإيجار القديم بدأت تتطبق فعليًا في عدد من المحافظات بعد ما لجان الحصر خلصت شغلها وحددت كل منطقة.. هل هي مميزة؟ متوسطة؟ ولا اقتصادية؟
وده أول تطبيق عملي للتعديلات الجديدة اللي ملايين المستأجرين والمالكين مستنيينها من زمان.

القانون بيقول إن الزيادة بتبدأ تتاخد من اليوم اللي بعد نشر قرار المحافظ والمهم هنا إن المستأجر مش بيدفع الفروق مرة واحدة لأ، بتتسدد على أقساط شهرية مساوية للفترة اللي تراكمت فيها الفروق يعني مفيش ضغط مفاجئ.. طيب المهم هتدفع كام؟

المناطق المميزة:
20 ضعف الإيجار الحالي وبحد أدنى 1000 جنيه.

المناطق المتوسطة:
10 أضعاف.. وبحد أدنى 400 جنيه.

المناطق الاقتصادية:
نفس الكلام.. 10 أضعاف، بس بحد أدنى 250 جنيه.

التقسيم ده معمول علشان يعكس مستوى الخدمات وقيمة المنطقة ويمنع أي تفاوت أو اجتهادات.

طيب المستأجر دلوقتي محتاج يعمل إيه؟ ببساطة.. يشوف قرار المحافظ لمنطقته، يعرف هو في أي تصنيف، ويتفق مع المالك على الأقساط وفروق السنين اللي فاتت، ولو في لبس، يقدر ياخد من المحافظة التصنيف الرسمي.

يعني كده خلاص الزيادة اتطبقت وهنشوف خلال الأسابيع الجاية شكل الالتزام والدفع بين المستأجرين والمالكين.