إلغاء اشتراطات استخراج تراخيص البناء.. إيه الادوار المسموح بيها

ناس كتير بتدور اليومين دول على طريقة استخراج تراخيص البناء في القرى والمدن وعدد الادوار اللي مسموح بيها. خصوصا بعد التعديلات الجديدة اللي هدفها تسهيل الاجراءات وتقليل وقت استخراج الترخيص.

والدولة بتركز على تنظيم العمران وتحقيق انضباط في السوق العقاري وتقديم تسهيلات للمواطنين اللي عايزين يبنوا أو يكملوا شغلهم اللي وقف.

وزارة التنمية المحلية بعد موافقة الرئيس عبدالفتاح السيسي قررت الغاء الاشتراطات البنائية الجديدة والرجوع لقانون البناء الموحد رقم 119 لسنة 2008.

ووزيرة التنمية المحلية منال عوض اعلنت تقليل خطوات الترخيص من 15 خطوة لـ 8 خطوات بس والرخصة هتطلع من المركز التكنولوجي.

في الوحدة المحلية من غير الرجوع للجامعات ومن غير عقد مشهر وهيتم توفير الرفع المساحي برسوم محددة.. والمدة كلها هتبقى 26 يوم عمل في الحالات العادية و40 يوم لو محتاج وثيقة تامين.

المدن اللي عرض شوارعها 6 متر مسموح فيها بارضي و3 ادوار متكررة والارتفاع مايزيدش عن 13 متر.. ولو الشارع عرضه 8 متر او اكتر الارتفاع بيساوي ضعف عرض الشارع ومسموح بنشاط تجاري واداري في الارضي والاول لو الشارع عرضه اكتر من 10 متر.

وفي المدن الجديدة وزارة الاسكان فعلت تقديم طلبات تراخيص المباني اون لاين من اول يناير.. يعني المواطن يقدر يقدم الطلب ويرفع الرسومات ويسدد الرسوم من غير ما يروح لمراكز الخدمات وده هيوفر وقت كبير للناس اللي عايزة تبني او تستثمر.