تحرك جديد في سعر الدولار.. عودة ميرسك لقناة السويس.. وارتفاع مفاجئ للذهب
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، تحرك جديد في سعر الدولار، وعودة ميرسك لقناة السويس، وارتفاع مفاجيء للدهب.
والبداية من سوق صرف العملات الأجنبية.. حيث واصل الدولار الأمريكي رحلة طلوعه قدام الجنيه المصري في التعاملات الأخيرة وده قبل أيام من وصول بعثة صندوق النقد الدولي لمصر علشان تعمل المراجعات الخاصة ببرنامج التمويل اللي مصر متفقة عليه مع الصندوق.
وفي صباح تعاملات جلسة النهاردة الثلاثاء كان أعلى سعر لصرف الدولار في بنك كريدي أجريكول مصر عند سبعة وأربعين جنيه تسعة وتمانين قرش للشراء وسبعة وأربعين جنيه تسعة وتسعين قرش للبيع بينما أقل سعر كان في بنك التعمير والإسكان عند سبعة وأربعين جنيه تمانية وخمسين قرش للشراء وسبعة وأربعين جنيه تمانية وستين قرش للبيع.
ولدى البنك المركزي المصري استقر سعر صرف الدولار عند سبعة وأربعين جنيه تسعة وستين قرش للشراء وسبعة وأربعين تلاتة وتمانين قرش للبيع.
وفي سبع بنوك بقيادة بنك مصر والإسكندرية والقاهرة وصل سعر الدولار لحوالي سبعة وأربعين جنيه أربعة وسبعين قرش للشراء وسبعة وأربعين جنيه واحد وتمانين قرش للبيع.
ولدى البنك الأهلي المصري والبنك التجاري الدولي مصر ارتفع سعر الدولار لسبعة وأربعين تلاتة وتمانين قرش للشراء وسبعة وأربعين تلاتة وتسعين قرش للبيع.
ونروح لخبر مهم جدا.. أعلن الفريق أسامة ربيع رئيس هيئة قناة السويس توقيع اتفاقية مع شركة ميرسك العالمية للخطوط الملاحية بترجع من خلالها الشركة بأسطولها بالكامل للعبور من القناة من تاني بعد أكتر من سنتين من الاضطرابات اللي خلت حركة الملاحة تتجه بعيد عن البحر الأحمر.
وأضاف ربيع إن في مباحثات متقدمة مع شركات ملاحة عالمية تانية للرجوع لقناة السويس قريب جدا وأكد إن الأزمة خلال السنتين اللي فاتوا أثبتت إن القناة عندها قدرة كبيرة على الصمود رغم تراجع الإيرادات.
وتوقع تحقيق إيرادات حوالي أربعة مليار ومية مليون دولار السنة دي على إن التحسن الأكبر يبقى في سنة ألفين ستة وعشرين وشدد إن القناة جاهزة تماما لاستقبال السفن ورجوع الخدمات لطبيعتها.
وكشف الفريق أسامة ربيع كمان عن ارتفاع حركة الملاحة في قناة السويس خلال أكتوبر واللي وصل فيها عدد السفن العابرة لألف ومية ستة وتلاتين سفينة وكمان ارتفعت الحمولة بنسبة ستاشر في المية وزاد العائد بالدولار بنسبة خمستاشر في المية.
ونروح لسوق الصاغة.. حيث شهدت أسعار الذهب في السوق المصرية والعالمية طلوع واضح خلال منتصف تعاملات النهاردة الاثنين بعد ما زادت توقعات إن الاحتياطي الفيدرالي الأمريكي ممكن يخفض سعر الفايدة الشهر الجاي وده خفف تأثير قوة الدولار حسب تقرير من منصة آي صاغة لتداول الذهب والمجوهرات.
وقال سعيد إمبابي المدير التنفيذي لمنصة آي صاغة إن أسعار الذهب في السوق المصرية طلعت حوالي خمسة وعشرين جنيه مقارنة بإغلاق تعاملات السبت اللي فات ووصل جرام الذهب عيار واحد وعشرين لخمسة آلاف ربعمية خمسة وسبعين جنيه وفي نفس الوقت طلعت الأونصة عالميا حوالي ستاشر دولار وسجلت أربعة آلاف واحد وتمانين دولار.
وسجل جرام الذهب عيار أربعة وعشرين حوالي ست آلاف متين سبعة وخمسين جنيه وعيار تمنتاشر حوالي أربعة آلاف ستمية تلاتة وتسعين جنيه بينما وصل سعر الجنيه الذهب لتلاتة وأربعين ألف تمنمية جنيه.
ونختم بخبر من القطاع المصرفي.. حيث إن موجة خفض أسعار الفايدة على الجنيه المصري خلال الشهور اللي فاتت خلت البنوك المحلية تعيد هيكلة منتجات الادخار وتطرح برامج جديدة أكتر تنوعا علشان تفضل جاذبة للمدخرين وتحافظ على تدفق الودائع اللي بتمثل النسبة الأكبر من حجم الودائع في الجهاز المصرفي.
وبعض البنوك قدمت شهادات وودائع بعوائد مدفوعة مقدما أو تراكمية بتتصرف في نهاية المدة بينما بنوك تانية خاصة الحكومية راحت لإصدار شهادات متوسطة الأجل بعوائد أعلى نسبيا بتتصرف سنويا مقارنة بالشهادات الشهرية أو ربع السنوية وده محاولة لتعويض العملاء عن تراجع العائد وضمان استمرار تدفق المدخرات.
وخفضت أغلب البنوك الفايدة على شهادات الادخار الثلاثية اللي تعتبر أكتر المنتجات جذبا للمدخرين بنسبة بين خمسة وسبعة في المية على فترات متتالية علشان توصل حاليا لعائد بين16 و18 %.
