توقعات بوصول سعر الذهب إلى 5000 دولار.. ارتفاع "خارج السيطرة" في 2026
في وقت العالم فيه مليان اضطرابات، وأسواق بتطلع وتنزل من غير إنذار، بيفضل الذهب واقف ثابت.. ويمكن كمان بيستعد لطفرة جديدة.
خلال 2025 الذهب حافظ على مكاسبه، لكن الغريب إن في ناس شايفة إن ده لسه ولا حاجة، وإن الارتفاع الحقيقي لسه في أولُه خصوصًا مع توقعات بوصول السعر لمستويات مرعبة في 2026.
تعالوا نشوف اللي بيحصل.. من كام سنة وكل الأسواق المالية تقريبًا في حالة "دوخة"، العملات الرقمية اتراجعت، الأسهم بتقفز وبترجع، الدولار مش مستقر، والصراعات حوالين العالم بتولع كل شوية، وفي وسط ده كله، الذهب واقف، مش بيتأثر بسهولة، بالعكس بيزيد واحدة واحدة من غير دوشة.
النهارده بقى، في توقعات قوية إن 2026 هتكون سنة تاريخية للذهب، لأن كل المؤشرات بتقول إننا داخلين على موجة صعود مختلفة تمامًا عن اللي شفناه قبل كده، في محللين شايفين إن الذهب كان المفروض أصلاً يوصل النهارده لـ 5000 دولار، وإن اللي جاي أقوى بكتير.
أول حاجة لازم نفهمها إن الذهب بيمشي دايمًا عكس حالة الاستقرار، كل ما العالم يتوتر المستثمرين يجروا عليه، والعالم بقاله كذا سنة ما بين أزمات سياسية، وحروب، وتوترات اقتصادية، وتقلبات عنيفة في العملات، ده معناه إن الطلب على الذهب كملاذ آمن بيرتفع يوم بعد يوم.
كمان في نقطة مهمة: العملات الرقمية اللي ناس كتير كانت شايفاها "ذهب المستقبل" اتعرضت لسقوط كبير، وده خلى المستثمرين يفوقوا ويعيدوا ترتيب أوراقهم.. يرجعوا للأصل اللي مبيخونش: الذهب.
لكن ليه 2026 بالتحديد؟
لإن في توقعات قوية إن البنوك المركزية هتبدأ تخفض الفايدة، لما الفايدة بتقل، الناس بتبعد عن الودائع والسندات وتروح للذهب لأنه بيبقى أكتر جاذبية وسهل الاحتفاظ بيه، ده غير إن البنوك المركزية نفسها بقت بتشتري كميات قياسية من الذهب في آخر كام سنة، وده مؤشر ضخم إن في حاجة كبيرة جاية.
كمان في احتمال كبير إن الدولار يضعف شوية خلال 2026.. وده لو حصل، يبقى كأنك بتولع موشن للذهب يرتفع بسرعة الصاروخ.
بعض المحللين شايفين إن الذهب دلوقتي في مرحلة "تجميع" يعني السعر ثابت ما بين مستويات معينة، والمستثمرين الكبار بيشتروا بهدوء من غير ما يعملوا دوشة، ودي عادة بتكون خطوة قبل انفجار سعري كبير، ولما نقول انفجار، إحنا بنتكلم عن قفزات ممكن تكون بمئات الدولارات في أيام.. وبآلاف في شهور.
السيناريو المتوقع إن الذهب يكسر مستوياته الحالية ويدخل في موجة صعود سريعة قبل نص 2026.. والمستويات اللي ناس كتير بتتكلم عنها دلوقتي مش 2500 ولا 3000، لكن 5000 دولار للأونصة، رقم ضخم؟ أكيد بعيد؟ مش قوي.. خصوصًا إن الذهب قبل كده زاد فوق ألف دولار في أقل من شهرين.
يعني باختصار.. إحنا على باب مرحلة جديدة للذهب، مرحلة ارتفاع ممكن تبقى من الأكبر في التاريخ، مدفوعة بتوترات، وسياسات نقدية، وطلب عالمي، ومخاوف من أزمات جاية.
والسؤال اللي بقى بيسأله كل الناس:
هل نلحق القطار قبل ما يتحرك؟ ولا نستنى ونشوف السوق رايح على فين؟
