وداعا للاستيراد.. 4 علامات فاخرة لـ حقائب السفر تنطلق بشعار "صنع في مصر"
مصر دخلت دلوقتي رسمياً عالم صناعة شنط السفر الفاخرة، في القنطرة غرب بالمنطقة الاقتصادية لقناة السويس، اتفتح أول مجمع إقليمي متكامل لصناعة شنط السفر لأشهر العلامات العالمية، بعد مشروعين ضخمين بقيادة شركتين صينيتين، باستثمارات أكتر من 70 مليون دولار وطاقة إنتاجية توصل لأكتر من 22 مليون حقيبة في السنة.
المنطقة الاقتصادية في القنطرة غرب شهدت في الفترة الأخيرة نقلة صناعية كبيرة في قطاع شنط السفر، المشروعين مملوكين لشركة صينية، وكل واحد ليه دور محدد في الإنتاج:
الأول متخصص في صناعة الشنط النهائية بجميع مراحلها.
الثاني بيصنع المكونات والإكسسوارات زي السوست، العجلات، المقابض، البطانات، والأقمشة التقنية، ده كله بيعمل تكامل صناعي كامل ويرفع نسبة المكون المحلي في المنتجات.
والمشروعين وفروا آلاف فرص العمل: المشروع الأول حوالي 3000 وظيفة على مساحة 120 ألف متر مربع، والثاني حوالي 2000 وظيفة على مساحة 80 ألف متر مربع.. اما الإنتاج السنوي الإجمالي للحقائب حوالي 22 مليون حقيبة، أغلبها للتصدير بنسبة 80%، والباقي 20% للسوق المحلي لأول مرة بجودة عالمية.
وخليني اقولك العلامات اللي بتتصنع لأول مرة في مصر:
1. سامسونيت
العلامة الأكبر عالميًا في الحقائب الصلبة واللينة، ومعروفة بعلاماتها الفرعية، دخول الإنتاج في مصر معناه التزام صارم بمعايير الجودة العالمية ورفع مصر لمستوى مراكز التصنيع الكبرى في آسيا.
2. ديلسي باريس
الرمز الفرنسي في السفر الفاخر، معروفة بالخفة والتصميمات المميزة وأقفال السلامة، وتصنيع الحقائب ومكوناتها في مصر بيفتح الباب لدخول السوق الأوروبي مباشرة بعلامة "صنع في مصر".
3. سويس جير
الجودة السويسرية المعروفة بالمتانة، خصوصًا في حقائب السفر وحقائب اللابتوب وحقائب الظهر، و دخول مصر في تصنيعها خطوة مهمة نحو المنافسة في أكبر الأسواق العالمية، خصوصًا السوق الأمريكي.
4. ترافليت
العلامة الألمانية الأشهر في شمال أوروبا، معروفة بالخفة والمتانة والسعر المناسب، و وجودها في المجمع الصناعي بالقنطرة غرب بيفتح الباب للتصدير لألمانيا والدول الإسكندنافية وهولندا، وهي من أسرع أسواق أوروبا نموًا.
وخليني اقولك ان الإنتاج من القنطرة غرب هيتجه لأوروبا، أمريكا، الخليج وشمال إفريقيا، والتشغيل التجريبي هيبدأ نهاية 2025، والتشغيل الكامل نهاية 2026.
والجيل الجديد من الشنط هيكون عليه شعار "صنع في مصر" على أشهر العلامات العالمية، وده مش مجرد إنشاء مصانع جديدة، ده تأسيس صناعة عالمية عالية القيمة وترسيخ لمكانة مصر كواحدة من أهم مراكز الإنتاج في سلاسل الإمداد العالمية لقطاع أمتعة السفر.
