مصانع أجنبية تتدفق لمصر.. تدشين مدينة عالمية للسينما.. وترقب في سوق الدهب
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، مصانع أجنبية تتدفق لمصر، وتدشين مدينة عالمية للسينما، وترقب في سوق الدهب.
والبداية بأخبار سارة من قطاع الصناعة.. وزير الصناعة كامل الوزير أعلن إن في إقبال ملحوظ من مصانع أجنبية عايزة تشتغل في مصر. ورغم إن انخفاض تكلفة العمالة بقت دلوقتي من أهم المزايا التنافسية اللي عند الاقتصاد المصري، لكن الميزة دي لسه مش مستغلة صح.
وطبقاً لكلام الوزير، المصانع الجديدة بتواجه نقص واضح في العمالة الفنية المدربة، وده في وقت شركات عالمية كتير خصوصا من الصين وتركيا، عندها رغبة قوية في الاستثمار الصناعي في مصر خلال السنة المالية 2024 و2025.
الشركات الصينية جاية في المرتبة الأولى بـ 532 شركة، وبعدها الشركات التركية بـ 439 شركة، وكلهم مستفيدين من إن تكلفة العامل في مصر مش بتزيد عن حوالي 150 دولار في الشهر، في حين متوسط الأجور في تركيا حوالي 900 دولار، والحد الأدنى عندهم 630 دولار.
أما في أوروبا فالأرقام بتبدأ من ألف لألف وخمسمية دولار. الأرقام دي بتدي مصر ميزة تنافسية ضخمة جدًا، غير طبعاً موقعها الجغرافي اللي قريب من أسواق أفريقية كبيرة.
ونروح لخبر تاني مهم.. مصر بتخطط تبني مدينة إعلامية كبيرة فيها استوديوهات ونماذج جاهزة لتصوير الأفلام والأحداث العالمية حوالين منطقة الأهرامات، على نفس نمط المدن الكبيرة اللي موجودة في أمريكا والهند. وده طبعاً محتاج فنادق وخدمات ومرافق مجهزة تستقبل فرق التصوير العالمية.
والخطوة دي جزء من خطة تطوير هضبة الأهرام بهدف تعظيم السياحة وجذب استثمارات من القطاع الخاص.
مجلس الوزراء كمان وافق على لائحة جديدة لتنظيم التصوير الأجنبي في مصر، والهدف منها جذب إنتاج سينمائي عالمي. وبموجب اللائحة دي، لجنة مصر للأفلام التابعة لمدينة الإنتاج الإعلامي هتبقى هي الجهة الوحيدة المسؤولة عن الموافقات والتصاريح، وكل ده هيتم من خلال نافذة رقمية واحدة.
الجهات الحكومية كلها هتكون مربوطة إلكترونياً مع اللجنة علشان تسهيل الخدمات. اللجنة كمان هتتولى الترويج لمصر كوجهة مناسبة للإنتاج الأجنبي، وتسهيل دخول معدات التصوير، وتنظيم مواقع التصوير، وحل أي عقبات قدام فرق الإنتاج، وكمان ترشيح شركات وكوادر فنية مصرية للمشروعات الأجنبية.
ونروح على سوق الصاغة.. أسعار الذهب في تعاملات اليوم، سعر جرام الذهب عيار 21 وهو الأكثر انتشاراً في مصر سجل 5460 جنيه، مع توقعات بتأثر الأسعار بأي خفض محتمل في الفايدة من الفيدرالي الأمريكي.
سعر الذهب عيار 24 وصل لـ 6240 جنيه.
عيار 22 سجل 5720 جنيه
عيار 21 سجل 5460 جنيه
عيار 18 وصل لـ 4680 جنيه
عيار 14 سجل 3640 جنيه
الجنيه الذهب سجل 43680 جنيه
والأوقية عالمياً حوالي 4065 دولار.
ومن الناحية التانية، لجنة السياسة النقدية في البنك المركزي أعلنت تثبيت أسعار الفايدة عند مستوياتها الحالية، وهي 21٪ للإيداع و22٪ للإقراض و21.5٪ للعملية الرئيسية، وكمان تم تثبيت سعر الائتمان والخصم عند 21.5٪.
ونختم بخبر من المجلس التصديري للأثاث اللي كشف إن قطاع الأثاث حقق نتائج ملحوظة من يناير لحد نهاية سبتمبر 2025، ووصلت صادرات الأثاث المصري لـ 277 مليون دولار بنسبة نمو 11٪ مقارنة بنفس الفترة السنة اللي فاتت. الكلام ده جه خلال اجتماع مجلس الإدارة اللي ناقش آخر تطورات القطاع وخطط التوسع التصديري ضمن خطة الدولة لزيادة الصادرات غير البترولية وتعزيز تنافسية الصناعات المصرية.
وأشار المجلس إلى إن أهم الدول المستوردة لمنتجات الأثاث المصري بتشمل السعودية والعراق وليبيا والإمارات وأمريكا واليونان وسوريا والجزائر، وده بيعكس نجاح استراتيجية المجلس في تنويع الأسواق وتقليل الاعتماد على وجهات محددة.
