من سويسرا إلى الشرقية.. مصر أول دولة خارج أوروبا تنتج شيكولاتة "ميلكا" الشهيرة
يا جماعة.. فيه خبر يمكن ناس كتير ما خدتش بالها منه، لكنه مهم جدًا وبيحصل يمكن لأول مرة في تاريخ صناعة الشوكولاتة في العالم.
علامة ميلكا" اللي كلنا عارفينها بطعمها الناعم ولونها البنفسجي الشهير.. اتصنعت رسميًا في مصر! وده مش بس موضوع مصنع جديد، لا ده التحول اللي خلى مصر أول دولة خارج أوروبا تنتج ميلكا بجودة أوروبية وبخطوط إنتاج معتمدة بالكامل.
القصة أكبر بكتير من مجرد شوكولاتة، دي حكاية ثقة في الصناعة المصرية، واستثمار ضخم، وخطوة بتغير شكل مصر على خريطة التصدير في الشرق الأوسط وأفريقيا والعالم.
ميلكا.. العلامة السويسرية اللي بدأت في جبال الألب سنة 1901، واللي بقالها أكتر من قرن بتتصنه حصريًا جوه أوروبا، قررت إنها تخرج لأول مرة من القارة ومكانش الاختيار أميركا ولا آسيا، لأ كانت مصر.
وتحديدًا مدينة العاشر من رمضان في الشرقية، داخل مصانع شركة "مونديليز إيجيبت"، اللي بتعتبر واحدة من أقوى الشركات العالمية في مجال الصناعات الغذائية.
الشركة شغلت خط إنتاج ميلكا في مصر سنة 2019، والهدف الأساسي ما كانش السوق المحلي بس، ولكن تحويل مصر لمركز إقليمي بيغذي الشرق الأوسط وشمال أفريقيا بشوكولاتة بطعم أوروبي وصناعة مصرية.
وده حصل فعلاً.. النهارده تقريبا 45% من إنتاج مصانع الشركة بيتصدر لــ 26 دولة، بداية من دول الخليج زي السعودية والإمارات والبحرين، لحد شرق أفريقيا زي كينيا وتنزانيا وإثيوبيا، مرورًا بدول في أوروبا نفسها زي قبرص واليونان وتركيا.
اللي بيسهل كل ده مش بس الجودة.. لكن موقع مصر اللي مدي ميزة لوجستية كبيرة، فبدل ما سفن تجي من أوروبا لأسواق الخليج وأفريقيا في وقت طويل وتكلفة عالية.. المنتجات بتطلع من مصر بسرعة وسعر أقل، وده اللي خلا الشركات العالمية تعتبر مصر "محور توزيع".
بس المثير بقى ان مصنع ميلكا في العاشر من رمضان مش مجرد خط إنتاج، ده واحد من أكتر مصانع الشركة تطورًا خارج أوروبا، خطوط عالية الدقة، تكنولوجيا زي مصانع ألمانيا وسويسرا، وجودة معمولة بمعايير عالمية.
لكن أهم نقطة ان المصنع ده بيشتغل بالطاقة المتجددة 100%
الطاقة الشمسية وطاقة الرياح هما مصدر الكهرباء بالكامل، وده خلى المصنع أول منشأة لإنتاج الشوكولاتة في الشرق الأوسط تشتغل بطاقة نظيفة كاملة.. وده جزء من خطة عالمية لتقليل الانبعاثات والحفاظ على البيئة.
أما بالنسبة للمنتجات اللي مصر بتصنعها، فالقائمة مش قليلة:
ميلكا بالحليب، بالبندق، بالأوريو، بالكريميل، بالفراولة، وبنسخ كتير مطلوبة في الأسواق، بعض النكهات الخاصة لسه بتيجي من أوروبا، لكن الشركة بتوسع الخطوط أول بأول حسب الطلب.
بس الأرقام بقى بتقول إيه؟ الأرقام بتقول ان مصر في سنة 2025 قفزت للمركز الـ 11 عالميًا في تصدير الشوكولاتة بنسبة 2.2% من السوق العالمي، وده حصل بسبب مصانع كبيرة زي "مارس مصر" و"مونديليز إيجيبت" وكمان مصانع محلية زي "كورونا"
ودخول ميلكا ضمن المنتجات المحلية كان عامل أساسي في القفزة دي.
النهارده، مصر مش بس بتصنع شوكولاتة تكفي السوق الداخلي لأ، مصر بقت عملاق جديد في صناعة الشوكولاتة وبتنافس بمنتجات بيطلع عليها ختم "صنع في مصر" بجودة أوروبية.
عشان كده قولتلكم ان رحلة ميلكا من سويسرا لحد الشرقية مش مجرد خبر.. دي شهادة جديدة على قوة الصناعة المصرية وقدرتها إنها تنافس وتكسب.
